Opopu na epeko lomakonakono oshiponga shi nyanyalifa sha kwatela mo komufandjai wopolifi a tulwa pedu Joseph Shikongo kaku shiivike kutya oli li peni, nombelewa yomutamanekindjai nosho yo opolifi otava yandje omauyelele a yooloka.
Omutamanekindjai ta vatele Martha Imalwa okwa ti epeko okwa li la shunifwa kopolifi kuningwe omakonakono a wedwa po, omanga omupedu komufalandjai ta vatele Elias Mutota ta ti kutya opolifi oya manifa omakonakono ayo nepeko oli li kombelewa yomutamanekindjai.
Ouyelele wa yooloka owa fiya ovanhu va limbililwa kombinga yaasho tashi ningwa po moshipofa eshi shoshiponga sha twaalela eemwenyo nhatu.
Eshi a popya noThe Namibian Etivali, Imalwa okwa ti ombelewa yaye oya teelela natango opolifi i manife omakonakono.
“Natango otwa teelela omakonakono opolifi a manifwe,” osho a ti ngaho.
Imalwa okwa koleka kutya epeko ola shunifwa kopolifi ku ka ningwe omakonakono a wedwa po ashike kakwa li lela ta dulu okudimbuluka kutya ola shunifwa naini.
“Vakwetu, ohandi longo nomapeko ahapu ndele kandi na omapeko aeshe momake ange.
Namibia okwa kula unene nokudimbuluka keshe shimwe. Eshi ndi shii, ola ya kopolifi ku ka ningwe omakonakono a wedwa po,” osho a ti ngaho.
Ashike nee, Mutota okwa ti opolifi inai mona epeko olo okudja kombelewa yomutamanekindjai nghee ye li yandjele ko.
“Oshikando shaxuuninwa twa popya, onda ti epeko oli li komutamanekindjai. Onghee okudja opo, inali alukila ko vali kopolifi. Aae, katu na epeko,” osho a ti ngaho.
Mutota okwa ti kutya opolifi oya manifa omakonakono ayo nonghee nee kai na vali epeko olo.
“Otwa ninga omakonakono etu notwe a manifa nepeko kali li nafye. Paushili woovene, epeko katu li na,” osho a ti ngaho.
Odjo mombelewa yomutamanekindjai oya lombwela oThe Namibian oshivike sha dja ko kutya eshi epeko kwa li ve li mona okudja kOmhangu yOpomba kOshakati momudo 2024, omupedu tamanekindjai Lucious Matota okwa li a pula Shikongo a tamanekwe moshipofa shedipayo lihe fi loshiningilewina.
Komufalandjai wopolifi ta vatele Anne-Marie Nainda okwa ti oThe Namibian nai ye kuMutota eshi a pulwa a tye sha, ta ti naye okwa kwatelwa mo moshikumungu.
“Ondi wete kutya omunhu ou to dolu okupopya naye okomufalandjai Mutota, oo naye a kufa ombinga moshikumungu omo,” osho a ti ngaho.
EEMWENYO NHATU DA KANA
Shikongo okwa li moshiponga mondjila yOndangwa-Oshikango osho sha twaalela eemwenyo dovanhu vatatu. Ovo va xulifila moshiponga omu ovo Frans Ndengu, Stefanus Lukas naSofia Ananias.
Okwa li vati ta konakonwa shi na sha nedipayo lihe fi loshiningilewina nokushinga nouhasha shi na sha noshiponga eshi.
