Kamusela melelo loshilando wongudu yoLandless People’s Movement (LPM) Ivan Skrywer okwa pula kutya oshike epangelo la tya filu kombinga younona ovo ve lihanena oshilando tava ehela nokulandifa oinima momapandaanda.
Skrywer okwa ti ovakalimo novatalelipo ova nyenyeta kelelo loshilando kombinga younona ava tava denge omatuwa avo nokupiyaaneka ovatalelipo, ta londwele kutya onghalo ei otai dulu okukala i na oilanduli ihe fi iwa.
Edi okwe di popya Etivali koshoongalele shoikundaneki shongudu.
“Ovakalimo ova tameka okunyenyeta kufye kutya omaliko avo otaa teyaulwa pomindilo domeendjila,” osho a ti ngaho.
Okwa ti elelo loshilando ola kundafana nopolifi kombinga yoshikumungu eshi, nopolifi oya yandja ouyelele kutya ounona vamwe ove ya moshilongo va holama moyeendifo nosho yo okulongifa omikalo dikwao doyeendifo.
“Ava ounona vashona. Opu na kukala pu na sha kombinga yoku va umbata. Opu na kukala pu na sha inashi yela,” Skrywer ta ti.
Okwa pula omangela yepangelo kombinga younona ava, unene ngaa ngee ovakufwa mo momapandaanda taku longifwa oveta yamuni.
“Epulo ole li kutya ohatu va twala peni ongoshilando.
Shaashi katu na omalukalwa,” osho a ti ngaho.
Skrywer natango okwa pula kutya omolwashike oministeli yomatembu, opolifi, etanga leameno neendadi tadi efa oshinima eshi shi twikile.
“Elelo oli li peni? Shapo opu na sha, inashi yela nawa . . . kombinga yokuxwaxwameka omwaalu womahoololo monakwiiwa,” osho a ti ngaho.
