Omunandjungu Michael Amushelelo mEtitano okwa thikama mompangu nokutula mo eindilo lyomeendelelo ta pula ompangu yi gandje elombwelo kepangelo li kuthepo omainda gokushunitha pevi ondapo yiihauto ngoka ga tulwa mopate yoWestern Bypass mOvenduka omasiku ga zi ko.
Ehangano lyokutonatela oopate moshilongo lyedhina Roads Authority, melongelokumwe nUuministili wIilonga nIiyenditho okwa li ya tsu kumwe okutula omayinda gokushunitha pevi ondapo yiihauto mopate onene yooshambali ndjoka ya tseyika nawa nedhina B1 Western Bypass.
Opate ndjoka yoB1 Western Bypass oya andjuka nohayi longithwa wo kiihauto mbyoka tayi ya moshilandopangelo nenge tayi zi mo.
Meindilo lya gandjwa kuAmushelelo kompangu, omupanguli Gabriel Komboni okwa popi kutya ota ka gandja etokolo lyeindilo ndyoka pehulilo lyomwedhi nguka.
Meindilo ndyoka Amushelelo otiindile ompangu yi gandje etokolo kutya okutula omainda mopate ndjoka kashi li paveta, ishewe kashili momuhingo gOveta yOopate nIihauto yo-1999.
Otiindile ompangu yi gandje elombwelo kuminista gwiilonga niiyenditho osho wo Roads Authority ya kuthepo omainda ngoka meendelelo, nenge shi ningwe muule woowili 24 konima elombwelo ndyoka lya gandjwa kompangu.
Lwahugunina, Amushelelo okwiindile ompangu yi gandje elombwelo kuminista osho wo koRoads Authority kaaya tule we omainda moopate oonene dhomoshilongo.
Epangelo okwa li lyakelwapo kuhahende Wilhelm Amukoto moshipotha shika.
Pokati mpoka omukuluntuwiliki gwoRoads Authority Mbahupu Tjivikua okwa tseyitha kutya oya longitha oshimaliwa shi li pooN$704 000 okutula po omainda ngoka gomOvenduka.
Tjivikua okwa popi kutya omainda ngoka oga tulwapo ongomukalo gwomeendelelo okukalekapo egameno omolwonkalo ya ndhindhilikwa mopate ndjoka yaantu taya lyatwa kiihauto uuna taya taaguluka.
Nonande opate ndjoka ohayi ende iihauto oyindji noonkondo, Tjivikua okwa popi kutya omainyengo ogendji gaantu taya taaguluka opate ndjoka oga thiminike opo pu katukwe onkatu yokukalekapo egameno nokuhupitha oomwenyo.
“Omainda ngoka oga nuninwa okushunitha pevi ondapo yiihauto, opo aahingi ya kale ya lungama osho wo okugandja ompito negameno kaayendi yokoompadhi omanga taku ka ningwa etokolo ndyoka tali kalele,” osho Tjivikua a popi ngaaka.
Oshiwike sha zi ko minista gwiiyenditho Veikko Nekundi okwa popi kutya etokolo lyokutula omainda mopate olyopakathimbo, nomathaneko opo ge li nale opo ku ka tungwe oontopa dhaayendi yokoompadhi monakuyiwa.
Minista okwa popi kutya uuna pwa monika oshimaliwa, otaku ka tungwa oontopa pomahala ga tothwa mo nale.
