Aanasikola mboka ya li iikulya ya yonuka mOkavango ya galukile kosikola

AANASIKOLA ye li 28 yokosekundo yaKatjinakatji Senior Secondary School moshitopolwa shaKavango Uuninginino mboka ya mbombolokele koshipangelo shEpangelo shaRundu mOmaandaha sho taku hokololwa ya li iikulya ya yonuka momuhandjo, oya galukila kosikola.

Aanasikola mboka okwa li ya tameke okweehama mepunda, notaku hokololwa kutya oya lalekwa molwashoka mongashingeyi oye li monkalo yi li nawa.

Omukuluntusikola gwosekundo ndjoka, Sebedeus Sihungu okwa lombwele onzonkundaneki yoNampa petameko lyoshiwike shika kutya aanasikola ye li po30 oya mono epango pokapangelo kaKatjinakatji, nolwanima ye li 28 oya tuminwa koshipangelo shEpangelo shaRundu opo ya ka mone uuhaku gwa gwedhwapo. Sihungu okwa popi kutya otaya fekele kutya aanasikola mboka oya kwatwa kuuwehame womepunda konima sho ya li oomboloto nomihaka uulalelo wOsoondaha.

“Mbala konima owala sho ya li, oya tameke taya ehama momapunda, taya mbilingwa nokukwatwa konkungo, naashoka oshe eta ya kale taye talelepo uundjugo lwiikando,” osho a hokolola ngaaka.

Okwa popi kutya iikulya mbyoka oya ningi nayi molwashoka omudhingoloko gwaKatjinakatji ogwa kala nolusheno talu gu ko, nopoompito dhimwe nokuli olwa kala kaaluko uule woowili dha konda pune. Sihungu okwa gwedhapo kutya uupyakadhi mboka owa tseyithilwa oshikondo shelongo moshitopolwa shawo opo ya vule okupewa okashina kolusheno shi kwathele uuna olusheno lwa gwa ko momuhandjo. Omukuluntusikola okwa gandja wo ombedhi kehangano ndyoka hali ya thikithile iikulya molwashoka oye etwa posikola mEtitano peha yi etwe mOlyomakaya.

Okwa popi wo kutya osikola yawo oya kala lwiikando tayi yakula iikulya ya ninga nayi. Pauyelele wa gandjwa komukuluntusikola, ehangano hali ya pe iikulya olina owala ololi yimwe ndjoka hayi longithwa okufala iikulya koosikola adhihe moshitopolwa shaKavango Uuninginino, naashoka otashi ulike kutya ohaya ende iinano iile.
Okwa gwedhapo wo kutya uuwinayi wulwe kololi ndjoka oomboka kutya inayi longwa yina okila yokutalaleka, nonande moshitopolwa shawo omuna oshitosi.

In an age of information overload, Sunrise is The Namibian’s morning briefing, delivered at 6h00 from Monday to Friday. It offers a curated rundown of the most important stories from the past 24 hours – occasionally with a light, witty touch. It’s an essential way to stay informed. Subscribe and join our newsletter community.