Aanangeshefa yokulanditha iinima mbyoka hayi mbestelwa okuza pondje yoshilongo oya tsakanene nomuprimaminista mehuliloshiwike lya zi ko mOvenduka okugandja omakemo gawo ngoka ya taalela moshikondo shawo.
Omuprimaminista Elijah Ngurare okwa gandja omayele kaanangeshefa mboka ya ninge omaindilo gokupewa oshimaliwa okuza koshikethahangano shokugandja oshimaliwa kaagundjuka shedhina National Youth Development Fund.
Omumvo gwa zi ko epangelo olya tseyitha oshimaliwa shoomiliyona N$500 shoka sha nuninwa omapendulopo neyambidhidho lyaagundjuka okupitila moshiketha sha tumbulwa metetekelo.
Ngurare okwiindile aagundjuka mboka ye li mongeshefa ndjoka ya longithe ompito yoshikethahangano shoka okupitila momaindilo.
Okwiindile wo aanangeshefa ya longithe ompito yokweetapo oongeshefa ndhoka mongashingeyi tadhi pumbiwa moshilongo.
“Omizalo dhoosikola inadhi kala we hadhi zi pondje yoshilongo, nadhi kale hadhi zi mongeshefa yo-Order With Me,” osho omuprimaminista a popi ngaaka.
Oshigongi shoka osha ningilwa mosaala yosikola ya-David Bezuidenhout High School mOvenduka, nokwa li wo sha waiminwa kukomufala gwehangano lyokugongela iihohela yepangelo lyoNamra, Sam Shivute osho wo minista gwemona Erica Shafudah.
Aanangeshefa yokumbestela iinima okuza pondje yoshilongo mboka ya tseyika nawa nedhina Order With Me, ohaya mbestele iinima mbyoka haye ya landithe meni lyoshilongo.
Omimvo dha zi ko oya kala taya nyenyeta kutya Namra oteya dhengele konankondongolo omolwomilandu dhawo osho wo iifuta.
Aangeshefa mboka oya kala taya nyenyeta kutya iifuta niihohela mbyoka hayi pulwa kuNamra poongamba oyi li pombanda noonkondo, nolundji ohayi kala nokuli yi vule oondando dhiilandithomwa naashoka ohashi dhipaga oongeshefa dhawo.
Omolwonkalo yokwaana iilonga moshilongo oyendji unene tuu aagundji ohaya imonene iiyemo okupitila mongeshefa ndjoka yokumbestela.
Namra okwa popile iifuta yopoongamba, nokwa popi kutya olundji iifuta mbyoka ohayi etwa po pauvathano niishiindalongo.
