Ehangano lyokulanditha omahooli lyedhina TotalEnergies olya sindana po otendela yokweeta omahooli moshilongo uule woomwedhi ndatu ano okuza muNovemba 2026 sigo omuJanuali 2027, nokweeta omahooli muule wethimbo ndyoka otaku ka hupitha epangelo oshimaliwa shoomiliyona N$220.5.
Ndhoka odha tseyithwa kuminista gwiikwafabulika, iikwamina niikwankondo Modestus Amutse, uunambo sho a popi kutya ehangano ndyoka lyaTotal olya hogololwa okuza methigathano ndyoka kwa li lya ningwa lyokweeta omahooli goolita 345.3 dhodisela nogopetrola moshilongo.
“Omusindani ote eke eta omahooli godisela kwa za oosenda 61 osho wo opetrola kwa za oosenda 71.
Muule woomwedhi ndatu otashi ti kutya otashi ka hupitha epangelo oshimaliwa shoomiliyona N$220.5 okuyelekanitha nonkalo moka tuli ngashingeyi,”osho a popi ngaaka.
Sigo omuApilili numvo epangelo olya kala hali futu ngoka te eta omahooli moshilongo iihohela molita kehe – ano oshimaliwa sha gwedhwa po shaayeti yomahooli, okupupaleka oonkalo ndhoka hadhi vulu okuholokapo momalweendo gokweeta omahooli moshilongo.
Minista okwa popi kutya epangelo olya kala hali futile ko aaniihauto iihohela mbyoka opo ondando yomahooli yi kale ohwepo – noshimaliwa shoka osha kala tashi zi moshikethahangano shepangelo shomahooli shedhina National Energy Fund.
Ashike okuza muMei sigo oSeptemba, sho ehangano lyedhina Vitol lya hogololwa mo okweeta omahooli moshilongo olya zimine okweeta omahooli moshilongo pwaana iihohela naashoka okwa li sha hupitha oshimaliwa okuza moshigandhi shepangelo.
Etokolo ndyoka okwa li lya ningwa netompelo ndyoka kutya haaluhe oondjila dhokweeta omahooli hadhi kala dha thinana nonkene kashi li pauyuuki iihohela yi kalekwe po.
“Oshikando sha zi ko [sho Vitol a pewa oshinakugwanithwa], uuministili okwa li wa kutha po thilu iihohela: omahooli okwa li taga etwa kondando yopevi, yaana iihohela ya gwedhwa ko.
Oshikando shika, otwa katuka onkatu onkwawo.
Omahangano agehe gane okwa li ga yi mondambo yokweeta omahooli kondando yopevi kaayina iihohela,”osho Amutse a popi ngaaka.
Ehupitho lyoshimaliwa shoka otali ke eta oshikethahangano shomahooli shi vule okupupaleka ondando yomahooli pootenga, osho Amutse a popi ngaaka.
Minista okwa popi kutya ehangano lyaTotalEnergies olyo lya hogololwa mo mondambo okweeta omahooli moshilongo, kohi yoshitayi shawo shedhina Totsa, konima yethigathano lya kwata miiti.
Ethigathano ndyoka olya sindanwa po kwa talika kondando taya pula, kwaangoka a adha iipumbiwa, koshiviha shonkalo ya nika oshiponga yokweeta omahooli moshilongo osho wo kondjokonona yehangano kehe, osho minista a popi ngaaka.
“Ethigathano ndyoka olyo lye eta oshizemo shika[Total a hogololwe mo], nuuministili otawu tsikile nokulongitha omulandu gwethigathano lya mangulukila ayehe lyokulanda nokweeta omahooli gomoshilongo kondando ohwepo ndjoka yi li po,”osho Amutse a popi ngaaka.
