Komanda gwopolisi yoshitopolwa shaShana, komufala Andreas Shilelo okwa londodha aahingi yuumbesa ya yande okufaalela aanona yAangola kOvenduka osho wo kiitopolwa yilwe yokuushimba.
Shilelo okwa gandja elondodho ndyoka pethimbo lyoshigongi shoka a ningi nooyene osho wo aahingi yuumbesa, mOshakati mOlyomakaya.
Okwa popi kutya okufaalela aanona mboka koondolopa dhilwe otashi vulu okumangitha omuntu koveta yaNamibia, kohi yoveta yokundjondjela omuntu moshilongo.
“Ohamu faalele aanona mboka yAangola, yamwe oye li pokati komimvo heyali no15 okuya kutha kiitopolwa yomonooli yoshilongo okuya fala kuushimba ngaashi kOvenduka, koSwakopo, kOmbaye osho wo koLiindili.
Aanona mboka kayena omauthemba, ashike onkene hamu ya londeke muumbesa nokuya faalela,”osho a popi ngaaka.
“Onkalo oya nayipala nepangelo olya hala okukatuka oonkatu. Kehe ngoka to ka adhika wa londeka aanona mboka oto kaya muudhingu,”osho Shilelo a londodha ngaaka.
Okwa popi kutya opolisi oya kala nokuyakelwako kaakwashigwana osho wo kaahingi yamwe yoombesa kutya aanona mboka ohaya yakelwa kuushimba moombesa pethimbo lyokongulohi.
“Otushi kutya uuna taye ya fala kuushimba aanona mboka ihaya zi mo mosheenditho ye kiimangulule nenge ya ka lande uunamunate. Ohaya mono owala ompito yokwiiwathela uuna ya thiki kOvenduka,”osho a popi ngaaka.
Shilelo okwa londodha wo aahingi yuumbesa yi iyageke okufaalela aakwashigwana kehe, mboka kaayena oodokumente dhuutemba, nokwa gwedhapo kutya aantu mboka omathimbo gamwe ohaya kala nomalalakano omawinayi nonkene oku ya kwathela otashi vulu okutulitha aahingi yoombesa moshipyu.
Ashike, omuhingi gwokambesa, Dave ya Hashili, okwa popi kutya ita tsu kumwe naandhoka dha popiwa kukomanda, nokwa popi kutya aanona mboka ngashingeyi haya ithanwa ‘Penge ondola’ moNamibia, ohaya faalelwa kuushimba ethimbo lyomutenya.
Okwa poipi kutya aanona mboka oye na omanganga nonkene uuna ya londo muumbesa ohaya tindi okuza mo.
“Omathimbo gamwe uuna ya londo mombesa ohaya tindi okuza mo shampa ya pulwa komuhingi gwombesa ya ze mo. Aanona mboka oyena omanganga, yo ishewe kaye na omikalo,”osho a popi ngaaka.
Ya Hashili okwa popi kutya aanona mboka omathimbo gamwe ohaya holama kohi yiipundi.
Okwa pula wo kombinga yaandhoka dha popiwa kuShilelo kutya opolisi kayi shi kutya aanona mboka ohaya lala peni mOvenduka.
“MOvenduka ohaya lala molwaamba lwopate yoIndependence Avenue mondolopa, koChina Town osho wo poKatutura Shoprite,”osho ya Hashili a popi ngaaka.
Okwiindile epangelo li kuthe ko ongaaku okukondolola poongamba osho wo okwiindjipaleka oomboloka moshilongo.
Aanona mboka otaku hokololwa kutya oyomuhoko gwAagambue nAamwila moAngola, naahingi yoombesa oya popi kutya aanona mboka ohaye ya moshilongo okupitila moshitopolwa shaHangwena osho wo koongamba dhaMahenene.
Pokati mpoka, amushangandjayi gwehanganokalelipo lyoombesa nootaxi lyedhina Namibia Bus and Taxi Association (Nabta), Pendapala Nakathingo, okwa popi kutya ehangano lyawo otali yambidhidha oonkambadhala dhopolisi okuyapukila onkalo yaaanona mboka yAangola taya mbombolokele moshilongo, ashike okwa popi kutya aahingi yoombesa hayo ando yena okukatukilwa onkatu yopaveta yendjondjelo lyaantu moshilongo medhina kutya oyo haye ya faalele kiitopolwa yilwe.
Okwa popi kutya pamilandu dhiiyenditho yokufelefula moNamibia, ngele opolisi nenge epangelo olya mono kutya itashi opalele aanona mboka ya faalelwe niihauto yokufelefula, nena shoka ohashi kala oshinakugwanithwa shopolisi nenge shomalelelo goondolopa molwashoka aanona mboka ohaya londokelwa moondolopa dha yooloka.
“Epangelo nenge opolisi itaya vulu okukatukila aahingi yoombesa nootaxi onkatu yendjondjelo lyaanona moshilongo omanga taya etha mboka ye na oshinakugwanithwa, molwashoka aanona mboka moshilongo ihaye ya mo noombesa osho wo ootaxi okuza koAngola.
Ohaye ya yoyene okupitila momikunda noondolopa, ndele ngashingeyi epangelo olya hala okukatukila onkatu aahingi kaayena mo olunyala.”
Nakathingo okwiindile pu totwe okomitiye ya thikama po maakalelipo yootaxi, aapolisi, aanambelewa yomatembu, ookansela yomiitopolwa osho wo aakelipo yomalelo goondolopa opo ku yapukilwe onkalo ndjoka yaanona mboka.
Pokati mpoka, Shilelo okwiindile aahingi yoombesa naakwashigwana ya kale haya yakeleko opolisi uuna ya mono aanona mboka yi idhenga ondjila okuninga oompangela dhokuya kuushimba okuza koAngola.
