Shipi FM a lombwelwa a galule aaniilonga mboka a tidha

Oradio yomOndangwa yoShipi FM oya lombwelwa kOmbelewa yaKomufala gwAaniilonga yi galulile miilonga aaniilonga yaali mboka kwa li ya lalekwa miilonga omweedhi dha piti.

Aawiliki yoopolohalama, Gustav ‘Dj Gee’ Sheehama naPatrick Kemanye oya lalekwa miilonga numvo koShipi FM ongomulandu anuwa gwokushunitha pevi omwaalu gwaaniilonga omolwonkalo yomahupilo tayi kanda omapunya. Nonande elelo lyoShipi FM okwa li lya yeleke kutya aaniilonga mboka oya lalekwa patompelo lya gandjwa pombanda, Sheehama naKemanye oye shi pataneke nokuholokela ompangu yaaniilonga opo ekanitho lyawo lyiilonga li talwe muule, taya popi kutya oya tithwa miilonga shaa li paveta.

Shehaama okwa lalekwa miilonga okuza momasiku 30 Auguste, omanga Kemanye okwa lalekwa momasiku 4 Septemba. Mbala konima owala sho ya lelekwa miilonga, Sheehama okwa pingenwa po popolohalama ye komuniilonga omukulu ngoka kwa li ha longele oradio ndjoka.

Pauyelele wu li kOmbelewa yOmpangu yAaniilonga, Kemanye okwa yelitha kutya okwa yakula etumwalaka koWhatsApp okuza kumwene gwoShipi FM, Martin Shipanga, te mu pe ombedhi kutya omolwashike a popi edhina lye mewangandjo pwaana epitikilo okuza kuye.

Kemanye okwa popi kutya okwa li owala a pititha mewangandjo onkundana yontumba moka e endulula ndhoka dha popiwa komuhona gwe[Shipanga] nokwe shi yeleke nokuli monkundana ndjoka kutya osha popiwa kuShipanga. Ashike nani osha geyitha omuhona gwe.

Kemanye okwa popi okupitila moodokumente dhomompangu kutya okuza mpoka okwa gandja ombili kuShipanga, ashike nando ongaaka anuwa Shipanga okwe mu lombwele kutya okuna okutaalela egeelo ndyoka i ilongela. Pauyelele woodokumente, Shipanga okwa tokola opo kaa holoke kiihokolola yomaihumbato, nonande okwa tseyithilwa kuyele momasiku 19 osho 20 gaSeptemba. Okupitila momukanda gwomompangu, Sheehama otaku hokololwa a tidhwa miilonga sha landula sho aaniilonga yoShipi FM ya pula egwedhelo lyoondjambi osho wo ehwepopeko lyonkalo yiilonga.

Okwa popi kutya elaleko lye miilonga olye mu guma noonkondo, pamaiyuvo, kolutu osho wo pashimaliwa, naashoka oshe mu etela esithahoni enene moshigwana. Konima yomakonakono ga ningwa kOmbelewa yaKomufala gwAaniilonga, oya mono kutya aaniilonga mboka yaali oya lalekwa miilonga shaali paveta, noya gandja elombwelo ya galulilwe miilonga, opamwe negwedhelo lyooN$5 698.

Oya lombwelwa ya shune kiilonga okuza mOmaandaha goshiwike shika, ishewe oondjambi dhawo nadhi kale dha futwa manga omasiku 30 Novemba inaaga pita. Ashike nando ongaaka, oShipi FM, okupitila moohahende dhawo Kopplinger Boltman, oya shangele aaniilonga mboka yaali ontumwafo mOsoondaha taya pula opo ya galule oshimaliwa shoka kwa li ya futwa ongoshitopolwa shelaleko miilonga – sho ya kuthwa miilonga.

“Omolwelaleko miilonga ndyoka tali popiwa kutya omwa tidhwa shaali paveta, otamu indilwa mu galule oshimaliwa shoka mwa futwa shehulitho po lyiilonga osho wo shomasiku gefudho gokomvula – shooN$14 170 – mu shi ninge manga omasiku 30 Novemba 2023 inaaga pita. Ngele omwa ndopa okufuta, nena omuyakulwa gwetu [Shipi FM] ota ka pula komeho noku mu katukila onkatu yopaveta,” osho oohahende ya shengele Sheehama naKemanye ngaaka.

“Otamu tseyithilwa wo kutya omuyakulwa gwetu[Shipi FM] ota ka pititha omukanda gwetseyitho lyelaleko miilonga momasiku 1 Desemba 2023, nota ka landula omilandu dhomondjila ngaashi tashi uthwa kokatendo 34 kOveta 11 yo2017 yAaniilonga.”

Shipanga ina yamukula komapulo ngoka a pulwa konzonkundaneki ndjika okupitila koWhatsApp nonande otashi ulike kutya okwe ga mona.

Oradio yoShipi FM oyi li oshitayingeshefa shehangano enene lyomunangeshefa Shipanga lyedhina Shipanga Holdings ndyoka wo li na iitayingeshefa yilwe ngaashi Tusk Investments, Shipanga Medical Services, Shipanga Security Services, Mama Fresh, Shipanga Property Portfolio, Shipanga Farming and Game Farm – okutumbula po ashike yimwe.