Okomisi yEameno oya ninga omafaneko ayo kombinga yonakwiiwa yakomufalandjai wopolifi Joseph Shikongo kupresidente Netumbo Nandi-Ndaitwah, ashike ouyelele natango inau yela nawa.
Okomisi, oyo hai yandje omayele kupresidente kombinga yeameno nepopilo loshiwana, okwa li ya shiva Shikongo omwedi wa dja ko opo a ka yandje ehokololo laye kombinga yoshiningwanima shokEumbo lEpangelo, oko omulumenhu a li hamunghele a ya meumbo lapresidente.
Shikongo vati okwa ti ke na ondjo. Konima yoihokolola, okomisi oya yandja omafaneko ayo kupresidente kombinga yonakwiiwa yaShikongo, oo kwa li ashike e na ko eemwedi di li o16 oshikako shaye shi pwe ko.
Shikongo okwa li a tulwa pedu muMei sha landula oshiningwanima shomulumenhu e livakela mEumbo lEpangelo, nokonima okwa ka pewa ombedi eshi vati a dopa okwaamena presidente.
Omunashipundi wOkomisi yEameno Patrick Nandago okwa anya okuyandja ouyelele kombinga yoshoongalele eshi.
“Eeno oshoongalele ondi shi shii notwa tuma omafaneko kupresidente opo a ninge etokolo.
Itandi ti ko sha vali shaashi oshinima shi na sha neameno osho presidente oye ashike ta dulu okuninga etokolo, kashi shii oikundaneki,” osho a ti ngaho.
Shikongo naye okwa anya okutya sha.
“Ondi li keumbo natango, oo omapopya ashike ehe na mwango nomitoto.
Itandi popi noikundaneki paife ashike ohandi ka tya sha ngee efimbo la wapala, osho tashi ka ningwa diva,” osho a lombwela oThe Namibian ngaho.
Omafaneko okomisi inaa yela. Ashike omapopyo oshivike shinya sha dile ko okwa li taa ti okomisi inai mona epuko momaliumbato aShikongo nomafaneko otashi dulika e li mouwa waye.
Inashi yela ngee Shikongo okwa hala okualukila mombelewa.
Ashike nee, omaume aye aa ti pefimbo ta yandje ehokololo laye kokomisi, okwa pula a pewe ombili moshiwana eshi a kufwa moilonga pamukalo u lengifa konima yomido dihapu domayakulo moshikondo shopolifi.
Oshinima eshi, eedjo oda ti, inashi tambulwa ko nawa kEumbo lEpangelo.
Eedjo oda ti otashi dulika aha alukile mombelewa yaye ashike otashi dulika a pewe ondjabi yaye oyo ya shaala ko nomauwa aye aeshe oule weemwedi o16 odo da shaala koshikako shaye.
Ekufo moilonga laShikongo ola fa la nyika okulikengelela moshikondo shopolifi, unene ngaa kEumbo lEpangelo.
The Namibian okwa uda kutya ovanambelewa vopolifi vamwe kEumbo lEpangelo okwa li vati va kufwa moilonga konima kwa li tava “feekelelwa kutya otava popile presidente mowii”.
Omundjadjukununi woikwapolitika nomilandu depangelo Ndumba Kamwanyah Etine okwa lombwela oThe Namibian kutya oshipofa shaShikongo okwa li tashi ungaunganwa nasho mehololamo, ta weda po kutya oshiwana kakwa li sha yelifilwa nawa.
“Oshipofa shaShikongo inashi ungaungwa nasho pauyelele, inaku fatululwa kutya omolwashike a tulwa pedu ndee fiyo okelulwa eli katu shi eshi she mu tulifa pedu.
Omulandu woshito okwa li u na okulandulwa noshiwana ngeno osha shiivifilwa,” osho a ti ngaho.
Kamwanyah okwa ti okafilu kenyenye kombinga yoshikumungu eshi otaka eta omafeekelo ngee omilandu adishe domondjila okwa li ngaa da landulwa.
“Nande ngeno ota alulwa otwa pumbwa okushiiva kutya omilandu di lipipo da landulwa.
Okwa ningwa omakonakono? Itaku ti ashike kapwa li sha sha puka, oshi na okufatululwa shaashi otashi eta omafeekelo moshiwana, omulandu ou nau fatululilwe oshiwana.
“Naye omunhu nedina laye ola pumbwa okuyelekwa pauyelele opo shiha kale sha fa ngeno a alulwa ashike shaashi okomanda.
Kwaame oupyakadi okuhalonga pauyelele ndee fiyo opapa, natango ohatu pula kutya oshike lela sha ningwa po,” osho a ti ngaho.
