Ngoka li sekuliti gwehangano lyokukeelela omaliko lyedhina G4S Samuel Shipanga (34) okwa zimine kutya okwa likola okawe okuza moNamdia pethimbo ya ponokelwa kookalyamupombo muJanuali omumvo gwa zi ko.
Pamikanda, Shipanga, ngoka wo kwa li oye a tula miipandeko gumwe gwomaafekelwa yeyugo, Sam Shololo, okwa popi kutya peyugo ndyoka opwa li uuwe wa halakana nokwa kutha po wumwe.
“Popepi noshihauto shimwe oshiluudhe, onda mono po oplastika yuuwe nonde yi kutha po,” osho Shipanga a popi ngaaka.
Okwa lombwele aakonakoni kutya sho a thiki kegumbo ongula yesiku lya landula, okwa yi kumumwayinagona, Immanuel Iipinge, ngoka e na ongalashe molukanda lwoombashu lwaGoreangab mOvenduka, nokwe mu pe uuplastika une wuuwe mboka wa li moplastika a kutha koNamdia.
“Onde mu pe uuwe mboka.
Kamwe komuuplastika okali nuuwe uhamano omanga muuplastika wulwe utatu kandi shi kutya omwa li uuwe ungapi, ashike kehe okaplastika okali ngaa nuuwe ngiika wu li puuhetatu,” osho Shipanga a popi ngaaka momukanda.
Okwa popi kutya mumwayinagona ngoka okwe mu lombwele kutya oku shi okulonga niikwamamanya.
Shipanga okwa gwedhapo kutya konima yiiwike iyali Iipinge okwe mu pe omayele opo a thige po iilonga yuusekuliti ye e mu waimine pongalashe, molwashoka ondjambi ye yuusekuliti onshona.
Momasiku 15 gaMaalitsa, Shipanga okwa tokola a thige po iilonga ye yuusekuliti nokwa waimine Iipinge pongalashe.
Momasiku 19 gaMaalitsa, Shipanga okwa popi kutya mumwayinagona okwa yi konooli, nokwe mu lombwele kutya ote mu tumine oshimaliwa shiikulya. Iipinge okwe mu tumine ooN$5 000 momasiku 19 gaMaalitsa, osho wo ooN$4 000 momasiku 20 gaMaalitsa, osho a popi ngaaka.
“Momasiku 22 gaMaalitsa okwa tumine ndje ooN$5 000, molwashoka okwa li tandi yi konooli,” osho a popi ngaaka.
Sho a thiki monooli momasiku 22 gaMaalitsa omumvo gwa zi ko, Shipanga okwa popi kutya okwa kwatathana naIipinge, nokwe mu yamukula kutya otayi koAngola.
“… opo e ke tu talele ko sha shokulya, shoka tashi ti kutya ota ka landitha uuwe,” osho a popi ngaaka.
Pokati mpoka, Shipanga okwa li wo a pula oshimaliwa shokulanda iipeleki yondunda yokomukunda, ndjoka a popi kutya oya li ya mona iihuna.
“Okwa tumine ndje ooN$5 000 kombaanga,” osho a popi ngaaka.
Shipanga okwa popi kutya lwanima okwa nothelwako komuntu e li mOvenduka kutya Iipinge opamwe nomulumentu gulwe oya tulwa miipandeko kopolisi momasiku 2 Apilili omumvo gwa zi ko.
Iipinge naAndreas Akwaake (56) otaku hokololwa ya tulwa miipandeko sho ya adhika noshimaliwa koomuma shooN$725 000, notaku fekelwa kutya osha zi melanditho lyuuwe wa yakwa moNamdia.
Aafekelwa mboka yaali oya kwatelwa momudhingoloko gwaNoordoewer.
Akwaake otaku hokololwa a lombwele opolisi kutya oshimaliwa shoka oshomunangeshefa gwomOndangwa ngoka e mu tumu a ka lande ololi ye koSouth Afrika.
Ashike nando ongaaka, omunangeshefa ngoka okwiikala oshinima shoka, nokwa popi kutya ina gandja oshimaliwa kaalumentu mboka yaali, ishewe haye e ya tumu.
Aalumentu mboka yaali otaku hokololwa ya li taya zi koSpringbok shaSouth Afrika pethimbo ya tulwa miipandeko.
“Anuwa mumwamemegona okwa popi kutya ongame nde mu tumu, ashike okwa fundju ndje tati otayi koAngola.
Omanga nani a yi koSouth Afrika.” Shipanga okwa popi kutya okwa kwatwa po momasiku 7 Apilili pethimbo ta pangelitha oshihauto mOndangwa.
Pauyelele woodokumente dhomompangu, omakonakono gopolisi ogu ulike kutya Iipinge naAkwaake okwa li ya yi koPort Nolloth, hoka anuwa ya landitha uuwe mboka inaawu kwewa.
Oodokumente dhomompangu odha popi wo kutya Shipanga okwa pewa kumwe oshimaliwa shooN$40 500 pangodhi sha ningwa lwiikando 14 ya yooloka okuza kuIipinge pokati komasiku 5 sigo 26 gaMaalitsa 2025.
Oshifokundaneki sho-Namibian Sun muFebuluali osha lopota kutya Namdia okwa fala G4S kompangu ta pula ofuto yoomiliyona N$314 sha landula oshiningwanima shoka sheyugo lyuuwe.
Shoka osha landula sho taku hokololwa uupakete wu li 446 wuuwe wa yakwa mombelewa onene yaNamdia mOvenduka pethimbo lyeyugo, momasiku 18 gaJanuali omumvo gwa zi ko.
Oshifo sho-Namibian Sun osha kundaneke kutya Namdia ota tamenekele G4S okukala a ya pambambo euvathanotsokumwe lyiilonga osho wo uuhasha moshinakugwanithwa shokugamenena po omaliko getungo lyawo pethimbo lyeyugo.
