Mayola mushona wOngwediva Etuhole Phillemon okwa indila ovaleli vaNamibia opo va pitike ovanyasha va kufe ombinga meyambulepo leliko, ta ti ovanyasha ova pumbwa eemhito, ndee kashi shii ashike omaudaneko.
Eshi kwa li ta popi pepatululo lOmaulikilo Opaipindi Okomudo aNgwediva Oshoondaxa, Phillemon okwa ti Namibai ita tungu eliko laalushe la kwatela mo keshe umwe omanga ovanyasha vahapu tava mono oixuna yokumona oilonga neemhito dongeshefa.
“Lipula ashike omunyasha moNamibia ta mane ofikola.
Ove na eedjapo, eendjodi nomadilaadilo. Ova hala okuninga eendokotola, eeindjinia, ovahongifikola, ovanangeshefa, ovanafaalama, ovanongononi novaleli, ashike ngee tava kongo eemhito, ohava ningi omaindilo ndee tava kala va teelela.
Konima, epulo ihali kala vali kutya onda hala okuninga shike, ashike ohali ningi ohandi mono ngaa vali omhito yokuninga sha?”
Phillemon okwa ti Ovanamibia ve dulife pomiliona ove na omido di li po15 fiyo opo34, ta ti oshilongo oshi na ovanyasha va wana nawa.
“Odo omitwe di dulife pomiliona, omadilaadilo neenghono.
Osho kashi shii omukundu. Omhito yakula yaNamibia,” osho a ti ngaho.
Mayola mushona okwa pula pa kale pu na ekwatafano la kola pokati kehongo noshikondo shoilonga okupitila meemhito domalideulo neewino.
Okwa pula yo eyambidido leengeshefa, ta ti ovanyasha ova pumbwa etwomukumo.
“Otwa pumbwa oshimaliwa, omadeulo, eengeshefa, outeknika neewino deengeshefa opo omadilaadilo awa a lundulukile meengeshefa daalushe.”
Phillemon okwa indila epangelo li yambidide eyambulepo leewino, omayakulo oundjolowele wopamadilaadilo nekufombinga lovanyasha momilandu dokuninga omatokolo.
“Yandjeni eemhito da wana kovanyasha. Kashi shii ashike poivilo yovanyasha, ashike nongee omilandu tadi dutwa, omitengenekwafaneko nomatokolo a kuma onakwiiwa yetu,” osho a ti ngaho.
