Ounona vofikola mOhangwena otava pewa ouyelele kombinga yomilele da amenwa, omakonakono omikifi hadi tandavele okupitila momilele nomayakulo e li ominge nomahepeko paukashikekokanhu okupitila moshikonga shomauyelele shomafiku anhe meefikola nomoshiwana.
Oshikonga, sha tamekwa kehangano ledina Dune Seven Community Foundation kEenhana momafiku 08 otashi i fiyo omomafiku 11 Septemba notashi talele po eefikola nhee moshitopolwahoololo.
Omayakulo otaa ka kwatela mo ouyelele kombinga youkoshoki notaa ka yandjwa kounona vofikola, oukadona vomido dopokati, ovakainhu ovanyasha, ovamati vomido dopokati novalumenhu ovanyasha, nosho yo ovakwashiwana momundingonoko.
Opolohalama ei oya eta pamwe omahangano ngaashi One Economy Foundation, Walvis Bay Corridor Group, Oministeli yOundjolowele nOmayakulo Opanghalafano nOministeli yEhongo, Omaduto, Ovanyasha, Omaudano, Omaunghulungu nOmifyuululwakalo.
Omuunganeki wehangano lOne Economy Foundation moshitopolwahoololo shaHangwena Penexupifo Haukongo okwa ti ehangano otali ka yandja ouyelele kombinga yomilele da amenwa.
“Ohatu ke va pulaapula ndee hatu va tumu va ka mone omayakulo opaundjolowele kovakufimbinga vetu moundjolowele,” osho a ti ngaho.
Omuunganeki akula wopoloyeka yoWalvis Bay Corridor Group Kennith Kamwi okwa ti oshikonga eshi otashi ka yandja omayakulo a fimana kombinga yomilele da amenwa kovanyasha, ta weda po kutya otava ka tala yo vali kokuyandja omaumbo kovakwashiwana mOhangwena nopondingandinga.
Omunashipundi wEwilikongu loshitopolwahoololo shaHangwena Efraim Shipindo okwa tambula ko oshinima eshi, ta ti otashi vatele ounona ovo vehe na oimaliwa yokuya koipangelo.
“Noshinima eshi, omayakulo aa etwa popepi navo,” osho a ti ngaho.
Oshikonga otashi lalakanene okweeta ouyelele woundjolowele wa fimana nomayakulo popepi noshiwana, tashi tu omukumo ovanhu va kale hava ka konakonwa nokunghonopeka elongelokumwe pokati kepangelo nomahangano omoshiwana.
Otashi kwashilipaleke yo vali kutya ounona vofikola novakwashiwana aveshe ova mona ouyelele nomayakulo taa dulu oku va vatela va ninge omatokolo omondjila kombinga yonghalonawa yavo.
