Oshilyo shikulu shopaliamente Elifas Dingara okwa pula epangelo noNamibia Post Limited (NamPost) va ungaunge noikumungu ya kundukida eependjela dovakulupe, ta londwele kutya ovakulupe otava fiwa vehe na oimaliwa yokulanda oipumbiwa yavo yakeshe efiku.
Dingara okwa ti ovo hava kwata opendjela vati ohava ende oinano ileile, tava kala va teelela momikweyo ndee ohava ka mona ashike eshi olufo lavo la fika kutya omadina avo kee li mo mosystema.
“Komukulupe oo tashi dulika a enda eekilomita dihapu, a futa osheendifo nokuteelela eevili dihapu, oshinima eshi kashi shii ashike omukundu ushona nandenande,” osho a ti ngaho.
Momukanda oo a yandja Oshoondaxa okwa pula ngee omadopo aa taa popiwa a etwa komalishangifo ovakwati vopendjela, kokukoleka omauyelele, okutuma omauyelele pokati koMinisteli yOimaliwa noNamPost, omapeko okufuta ile pamwe omakwatafano a nghundipala pokati komahangano.
Dingara okwa ti onghalo otai limbililike unene kovakulupe momikunda nokoitopolwa yokoushai ovo tashi dulika vehe na oyeendifo yopaumwene, omayakulo opamalungula neenghono dokweendauka keshe efimbo va yuka keembelewa depangelo.
Okwa popya yo vali kombinga yomikundu donale da yandjwa mopaliamente kombinga yomikundu didjuu da taalelwa kovakwashiwana kombinga yeyandjo lopendjela loNamPost, mwa kwatelwa eelopota dovakulupe tave lidenge po manga va teelela momikweyo.
Okwa indila omanyamukulo kombinga yomauyelele aavo hava kwata opendjela a kana, eyandjo lopendjela tali katekwa, omilandu dokushuna mo ovo va wa mo, eependjela inadi yandjwa, efimbo olo tashi kwata okukandula po omanyenyeto nekalelepo loinima.
“Eshi kashi na sha nopolitika.
Oshi na sha novanhu. Eshi oshi na sha nefimaneko lounhu. Eshi oshi na sha nekalelepo loinima,” Dingara ta ti.
