OVADALI kOpuwo ova indilwa va fimaneke ehongo lounona lopetameko, okuputuda ounona nawa noku va pa oikulya i na oundjolowele, sha landula eetundi da yandjwa pefimbo lopolohalama yokutekula ounona tai lalakanene okuxwepopeka onghalonawa younona.
Oshinima eshi okwa li sha ningwa pefimbo leenghundafana doshiwana di na sha neputudo lounona poEtati Kindergarten kOpuwo Omaandaxa, di na sha nokuyambula po omahongo ounona nonghalonawa yeefalimi. Omukalimo umwe womOpuwo Kurukaze Orokapare okwa ti opolohalama oye mu longa kutya ounona inava pumbwa okukala itava i kofikola shaashi ovadali vavo itava dulu okulanda omidjalo dofikola.
“Inandi twala ounona vange pokinda i li popepi shaashi kakwa li ve na omindjalo dofikola, ashike paife ohandi va twala ko kutya nee kave na sha,” osho a ti ngaho.
Omukufimbinga umwe, Kunondjila Korukuve, okwa ti opolohalama oye mu longa a kale nokukufa ombinga meenghalamwenyo dounona vaye ndele ta kala alushe nokutala nawa omaliumbato avo.
Okwa ti ounona otava dulu okuyelekela omaliumbato ovadali meumbo, osho tashi ulike kutya ovadali ova pumbwa okuliumbata nawa komesho yomaludalo avo, unene ngaa ngee ounona tava danauka puhe na ou te va wilike.
Opolohalama oya twa ootate omukumo va kufe ombinga meenghalamwenyo dounona vavo, tai yeleke kutya okutekula ounona nokutunga po omakwatafano a kola navo kashi shii ashike oinakuwanifa yooina.
Ovakufimbinga natango ove lihonga kombinga yoikulya oyo tai tungu omalutu ounona, okutekula ounona nawa nefimano lokukwatela mo ovadali ovo ve na omaulema meepolohalama domayambidido oshiwana.
Natango, Mandu Tjikange okwa indila oomeme moshiwana shOvahimba va kale nokukonga omayakulo oundjolowele koipangelo ngee tava mono ounona, ta londwele kutya okumonena ounona momaumbo oshinima sha nyika oshiponga, mwa kwatelwa oinima oyo tai dulu okulemaneka oomeme nounona.
“Ovakainhu vahapu mOpuwo ohava monene ounona momaumbo ndee onda uda kutya oshinima eshi itashi dulu ashike okweetela meme oshiponga ashike nokaana yo,” osho a ti ngaho.
