Ovaameni vomaliko tava longo moshikondo shomatungo nava futwe she likolelela kondodo yeendjabi oo ya tulwa po paveta, nande okwa didilikwa kutya moshikondo shomatungo hasho tashi ningwa.
Ouministeli wOuyuki nOipambele yOilonga owa yeleka oshinima eshi Etitano konima eendodo deendjabi dipe neenghalo doilonga dovanailonga moshikondo shomatungo da ya moilonga mefiku lotete Septemba.
Eudafano kombinga yeendjabi edi otali kala moilonga omido mbali.
Omukulunhuwiliki ta vatele wouyuki noipambele yoilonga Aune Ndjandjima okwa ti eudafanotwokumwe pokati kehangano lomatungo ledina Construction Industries Federation of Namibia (CIF) nehangano lovanailonga ledina Matal and Allied Namibian Workers Union (Manwu) aa tula po ondjabi yovaameni vomaliko i fike poN$153.88 meevili di li 12 momudo wotete, omanga momudo omutivali tai ka kala i fike poN$161.57.
Okwa ti momudo wotete otava ka kala tava futwa oshimaliwa shi fike poN$12.82 movili omanga momudo omutivali tava ka mona shi fike poN$13.46.
Ndjandjima, nande ongaho, okwa weda po kutya eendjabi edi odi li pedu neenghono kwaado da tulwa po pashiwana dovaameni vomaliko.
Okwa ti ngee ovanailonga itava futwa oimaliwa i fike pwaayo tai pulwa paveta nakuningwe eudafanotwokumwe.
Eshi otashi ti ovaameni vomaliko tava longo moshikondo shomatungo nava mone ngeno oshimaliwa shi fike poN$16 movili neudo.
Otashi ka ya nee pombada fiyo opoN$18 movili okutameka muJanuali 2027.
Oministeli oya ti ovayandji voilonga inava longifa ondjabi yovaameni vomaliko i li pedu oyo i li meudafanotwokumwe loshikondo shomatungo.
Ndjandjima okwa ti ouministeli otau ungaunga nomayooloko aa notai ka wapaleka omulandu okupitila momulandu womondjila.
Fiyo sha ningwa, ondodo yeendjabi i li pombada yopashiwana oyo nai longifwe.
