Kamusela woshikandjohoololo shOndangwa Urban, Leonard Negonga, okwa indila ovanafikola aveshe noshiwana shi kwatele po omufyuululwakalo neenghedi, ta ti omufyuululwakalo natango ou li ekanghameno loukwatya noukumwe woshiwana.
Negonga edi okwe di popya pefimbo ta patulula pambelwa Ondangwa Urban Annual Constituency Culture Festival Etitatu pOshitayi Primary School.
Okwa ti oshivilo otashi yandje omhito ya fimana kovanafikola noshiwana, shi hokwe, shi kaleke po nokuxwaxwameka omufyuululwakalo woshilongo.
“Omufyuulukwalo ohau ulike kutya ofye oolyelye.
Ohau holola ondjokonona yetu, eenghedi detu, omalaka etu neewino okudja komapupi nomapupi,” Negonga ta ti.
Okwa tanga ekufombinga liwa lovanyasha moinyangadalwa yomufyuululwakalo ndee ta ti ove li ovakwatelikomesho veenghedi doshilongo.
“Oshivilo eshi otashi yandje omhito iwa kovanafikola vetu noshiwana shi hokwe, shi kwatele po nokuxwaxwameka eenghedi detu da yooloka odo da ninga oshiwana shetu shi kale sha yooloka.
Otashi etifa omukumo okutala ovanyasha tava kufa ombinga nawa moinyangadalwa yomufyuululwakalo shaashi ovo ovakwatelikomesho veenghedi detu novaleli vokomongula voshiwana shetu,” osho a ti ngaho.
Negonga okwa ti okukwatela po omufyuululwakalo ohaku nghonopaleke omakwatafano opanghalafano, efimanekafano noukumwe mokati koiwana.
Ta weda po kutya manga oshilongo tashi twikile nokuxuma komesho, otashi twikile nokulitula mo mokwaamena omifyuululwakalo neenghedi odo da kalela po oukwatya washo.
Eshi kwa li ta popi novanafikola poshivilo opo tuu opo, omukulunhufikola, Phillemon Ndapuka, okwa yeleka kutya omufyuululwakalo nau tambulwe ko ndee tau fimanekwa shaashi owa kalela po oukwatya nodiililo yavo.
“Omufyuululwakalo ohau yandje ouyelele womonakudiwa u na oshilonga, owa dana ongandangala mokuxwaxwameka ombili, okukaleka po elandulafano nokunghonopeka oukumwe moshiwana,” Ndapuka ta ti.
Oshivilo eshi osha eta pamwe ovanafikola okudja keefikola da yooloka moshikandjohoololo va ninge oinyangadalwa ya yooloka yopamufyuululwakalo tai lalakanene okukwatela po nokuyambula po eenghedi doshilongo.
Oshitopolwahoololo shaShana otashi dana oivilo yopamufyuululwakalo moikandjohoololo aishe i li 11.
Keshe oshikandjohoololo otashi dana oshivilo shasho mefiku olo la tulwa po oshikando shotete.
Opolohalama oya tameka Etivali moshikandjohoololo shOndangwa Urban nokwa teelelika i xule momafiku 21 Juli noshikandjohoololo shUuvudhiya.
– NAMPA
