Oshikondo shoyeendifo otashi pula opoopaliamente i dimine eebiliyona N$3,2

… oshikandjo shoilonga osha hala eemiliyona N$789

Oshikondo shoyeendifo mouministili woilonga noyeendifo osha hala opaliamente opo I dimine omutengenekwafaneko weebiliyona N$3,2 womudo 2024/25.

Minista woilonga noyeendifo John Mutorwa eshi kwa li ta yandje oshipopiwwa mopaliamente Etine loshivike sha dja ko okwa ti oshikandjo oshi na eepolohalama hamano oko oshimaliwa osho tashi ka longifwa.

Eshi osha kwatela mo eyambulepo lomatungo,eepate, oupale veedila, eendjila domashina okolutenda nomatungo epangelo.

Oilonga yoshimaliwa imwe okulongulula nokutunga eengalashe depangelo.

Moshilongo omu na eengalashe depangelo di lwopu11.

Mutorwa okwa ti, oproyeka yoyeendifo noshimaliwa shavo osho va pula naasho va tengeneka, oya popiwa peepolohalama domayambulepo domudo 2024/25 nomudo 2026/27, okudja pepandja 340 fiyo 396.

“Ohandi pula nefimako linene ovanailonga pamwe naame, ovafimanekwa amushe meumbo lopashiwana opo mu tale nawa keeproyeka ngaashi da tumbulwa pomapandja opo, unene ngaa pefimbo lomatalululo okakomisi,” Mutorwa osho a ti ngaho.

Okwa weda po vali ta ti okulonga eendjila moNamibia kakwa li oshinima shipu nandenande , nokashi shi shipu noitashi ka kala shipu.

“Elineekelo lepangelo kutya eendjila nadi kale tadi eta exumokomesho. Eendjila nadi kale tadi tula kumwe oshilongo shetu noilongo yopoushiinda naikwao ihapu.”

Minisita okwa ti vali eendjila nadi tule kumwe oitopolwahoololo moNamibia, eedoolopa neefaalama ndee tadi dulu okweendeleleka okutwala omayakulo a pumbiwa oshali keenhele di lili novanhu yoo.

“Keshe exumokomesho nali landule eendjila ndee hee ndjila tadi shikula exumokomesho,” Mutorwa osho a ti ngaho.

Okwa ti opu na eendjila dihapu tadi longwa moitopolwahoololo ya yooloka ashike inadi pumbwa nande di kangahame medina loshimaliwa.

OSHIKONDOSHOILONGA OSHA HALA EEMILIYONA N$789

Kombinga ikwao, oshikondo shoilonga shepangelo mouministili oo tuu ou osha hala opo opaliamente I dimine omwaali woshimaliwa shifike peemiliyona N$789 okudja moshimaliwa shomudo 2024/25 fiyo omudo 2026/27.

Mutorwa okwa ti opu na eepolohalama mbali da kula odo da tulwa moilonga okupitila moshikondo shoilonga yoshiwana, omatungo omauyelele nomakwatafano opaungoba oo a pumbwa okuwedelwa nokuwilika omaliko epangelo.

“Eepolohalama domawedelo omatungo omauyelele nomakwatafano opaungoba pamwe nomayambulepo omakwatafano keembelewa da kula douministili neembelwa dopaitopolwahoololo,” Osho a ti ngaho.

Omayakulo akwao e li koshi yeepolohalam edi omwa kwatelwa okulongulula omatungu, okuwedela, okuyambula po nokutunga eembelewa dopaitopolwahoololo.