Minista gwiipindi, iikwamina niikwankondo Modestus Amutse okwa popi kutya oshikethahangano shopashigwana shomahooli niikwankondo shedhina National Energy Fund (NEF) onkene shi li monkalo yi li nawa pashimaliwa nonande okwa li sha longitha oshimaliwa shoobiliyona N$1.3 muule woomwedhi mbali okupupaleka oondando dhomahooli.
Okwa popi kutya epangelo okwa li lya longitha oshimaliwa okuza moshigandhi shaNEF okukandeka ondilo yomahooli kaaniihauto omolwoondando dhomahooli ndhoka dha kala tadhi londo muuyuni.
Opo kondando yomahooli ku yululwe pootenga dhomahooli moshilongo epangelo okwa li lya kwathele sho lya longitha oomiliyona N$805 muApilili, omanga muMei olya longitha oomiliyona N$490, okuhwepopeka onkalo, naashoka osha thigi owala moshingadhi oshimaliwa shi li pokati koomiliyona N$200 noomiliyona N$300, sho a Amutse a popi ngaaka.
Okwa popi kutya okuna omukumo kutya omilandu omipe ndhoka taye eta po otadhi ka galulila oshimaliwa moshigandhi.
“Onkalo ndjoka yi li po ngashingeyi yokweeta omahooli moshilongo, osho wo omulandu omupe hoka ta tu ka lundulukila, gwokweeta omahooli pamuhanga, ondina einekelo kutya otagu ka galulula ayihe kondjila,” osho minista a popi ngaaka,
Uuministili mboka okwa li we eta po omulandu gwopakathimbo gwokeeta omahooli moshilongo uule woomwedhi ndatu nehangano lyomuuyuni lyedhina Vitol omanga tali ningi omathaneko omape gwokweeta omahooli moshilogo pamuhanga.
Omulandu ngoka omupe otagu ka hupitha oshimaliwa shoomiliyona N$300 omwedhi kehe.
“Naashoka otashi ka shuna kondjila oshikethahangano molwashoka mongashingeyi ohatu futu oomiliyona N$300 komwedhi dhiifuta mbyoka tatu ka kutha po,” osho minista a popi ngaaka.
Iifuta nenge iihohela mbyoka tayi popiwa otaku hokololwa hayi gwedhwa komahooli netompelo kutya omathimbo gamwe oondjila ohadhi kala dha thinana dhokweeta omahooli moshilongo.
Minista okwa popi kutya epangelo ohali futile ko aaniihauto iifuta mbyoka hayi gwedhwa ko kaalandithi yomahooli naashoka ohashi eta oshimaliwa oshindji shi longithwe okuza moshigandhi shepangelo.
Okwa popi kutya iihohela yoludhi ndoka otayi ka kuthwa po molwashoka oya nongele kutya haaluhe oondjila dhokweeta omahooli hadhi kala dha thinana nonkene kashi li pauyuuki iihohela yi kalekwe po.
