Kamusela woshikandjohoololo shaMuthiya Erastus Nekomba okwa londwela oshiwana shi kwate nawa opendjele yovakulupe konima eshi kwa li va talela po omaumbo ovakulupe oshivike sha dja ko ndee tava shakeneke ovakulupe vavali ve li meenghalo itadi nuwa omeva nandenande.
Nekomba okwa ti opendjela yovakulupe oya nuninwa okuxwepopaleka eenghalo davo, ashike ovakwapata vamwe otave i longifa monima ya puka.
Pefimbo letalelepo komukunda Oshiya Shomatope oshivike sha dja ko, Nekomba novanambelewa okudja kOministeli yEfikopamwe lOukakwashikekookanhu nOnghalonawa yOunona, mwa kwatelwa nomuxungimwenyo novanambelewa vopolifi ova hanga eumbo limwe lomukulupe (80) lihe shii okutalwa, ta ti osha nyika oshiponga koundjolowele.
Omukulupe okwa ti oha di novanhu ve li omulongo, mwa kwatelwa outekulu ovo ve na ina ha longo mOvenduka, ashike eumbo alishe oli li komapepe aye.
“Onde va pa oN$2 000 va lande oitungifo, ashike fiyo onena inandi mona po nande oshimwe. Natango ohandi nangala monduda yange ikulu, oyo u wete kutya kai li monghalo iwa,” osho a ti ngaho.
Okwa ti kutya omutekulukadona waye nohondamati yaye ova tameka okutunga mepya laye shihe li pahalo laye.
Nekomba okwa yandja omaano oipeleki opo omukulupe a tungilwe onduda ndee ta udaneke okuyandja oshikukuta meumbo omo.
Ashike nande ongaho, omutekulu okwe likanyuna omapopyo ainakulu, ta ti okwa pewa epitikilo kumwene womukunda a tameke okutunga.
Okwa weda po kutya ovakwapata ova tota epandja koWhatsApp va ongele oimaliwa yonduda.
Ovanambelewa ova yandja omayele kofamili i xwepopeke oukoshoki ndee tai longelekumwe opo i manife okutunga onduda yomukulupe noitungifo oyo a pewa omaano.
Ongudu yovanambelewa ei konima oya talela po vali omukulupe womukainhu (88) momukunda Malindi, oo naye a lopota kutya oimaliwa yaye iha kwatwa nawa.
Omukulupe okwa lombwela ovanambelewa kutya omonakadona waye ou mushona okwe mu kufa okakalata kaye kaNamPost, oko haka pitile opendjela yaye, manga ina ya kOkahandja muMei.
Okwa ti omwedi wa dja ko kopendjela yaye okwa mona ko ashike oN$800. Okwa weda po vali kutya eemumbwe domeumbo ode mu djuupalela.
Ovanambelewa ova lombwelwa kutya okwa ninga omafiku ina lya shaashi meumbo kamu na oikulya.
“Onda hala opolifi i kwafe nge i lombwele omonakadona wange kutya onda hala okakalata kange kaNamPost,” osho a ti ngaho.
Omonakadona waye ou a kula (63), okwa ti okwa dja kOvenduka momudo 2024 a file meme waye oshisho noha longifa opendjela yaye paife okulanda eemumbwe domeumbo.
Nekomba okwa ti oiningwanima i li ngaho otai teya elalakano lopolohalama yopendjela yepangelo ndee ta londwele kutya keshe omunhu ta longifa nai opendjela yovakulupe ota ka taalela oilanduli. –NAMPA
