Oohango dhaDesemba odha puma ko

… aasita taya hokanitha aaholathani ya konda po10 poshikando

Ngaashi shi li onkalondjigilile oohango pethimbo ndika lyomatango omanene monooli yoshilongo ohadhi kala ofulundundu, naashoka olundji ohashi tula omitengi omidhigu kaasita yamwe mboka ya hokolola kutya mongashingeyi otaya hokanitha aaholathani ya konda po40 mesiku.

Aasita oya popi kutya shoka otashi ti otaya hokanitha aaholathani ya konda po10 poshikando.

Omusita Taarah Shalyefu gwongeleka yo-Saint Patrick Anglican Church mOngwediva moshitopolwa shaShana okwa popi kutya omwaalu omunene ngoka a hokanitha mesiku sigo oompaka, aaholathani ye 14.

Ashike nando ongaaka okwa popi kutya oongeleka dhomagongalo omenene ohadhi vulu okuhokanitha aaholathani ya konda po40 mesiku.

“Aantu oya ninga oyendji taya hokana, kandishi kutya oshike tashi ya hwahwameke,” osho a popi ngaaka.

Omahala gokuhokana ehuliloshiwike ndika oga pwa po mongeleka yEenhana Elcin moshitopolwa shaHangwena, molwashoka aaholathani 14 okwa tegelelwa ya tulwe miipundi.

Omudhiginini gwiiniwe mongeleka ndjoka, Vicky Nghiluwa, okwa koleke kutya oohango odha ninga odhindji noonkondo, molwashoka sigo oompaka megongalo lyawo oya hokanitha oohango 26 okuza ashike petameko lyomwedhi nguka.

“Mboka ya thaneka okuhokana oya pumbwa okukala yi ishangitha aluhe petameko lyomumvo, naashoka ohashi tu kwatha mokuninga omalongekidho” osho a popi ngaaka.

Nghiluwa okwa popi kutya kapuna naanaa omashongo omanene kuyo molwashoka aluhe ohaya kala ye shi ilongekidhila okutala kutya aluhe Desemba ohaya kala ya tega oohango odhindji.

Omusita Ndeshipanda Ashipala gwongeleka yaTsandi moshitopolwa shaMusati okwa popi kutya sigo oompaka oohango a hokanitha odhindji mesiku odhi li hamano.

Okwa popi kutya ohashi ya dhigupalele uuna ya taalelwa koohango odhindji tadhi ningwa mesiku limwe.

Omusita gwegongalo lyaNiipa moshitopolwa shaShikoto, Epafrus Haingumbi okwa popi kutya iinyangadhalwa mombelewa osho wo omahala ga ngambekwa gokuhokanitha oyo yimwe yomomashongo haya kala ya taalela pethimbo ndika lya Desemba lyoohango fulundundu.

“Uuna kuna oohango odhindji, dhi li nande heyali mesiku, ethimbo ohali kala eshona, unene tuu molwashoka aahokanathani oyena oku udhitha oofooloma,” osho a popi ngaaka.

Mongeleka yaNgela moshitopolwa shaHangwena, omusita Martin Kashihakumwa okwa popi kutya mboka ya thaneka okuhokana ohaya indilwa ya tseyithile egongalo kuyele, petameko lyomumvo noyendji oyehole muDesemba.

“Uuna omahokano ga gwile mesiku limwe, nena ohatu uvathana opo tu kuthe esiku limwe nenge gaali, shi ikwatelela komahala ngoka ge li po,”osho a popi ngaaka.

Kashihakumwa okwa popi kutya oohango 20 odha shangithwa okuhokanithwa megongalo lyawo muDesemba numvo, ashike itadhi ningwa mesiku limwe.

“Oshi ikwatelela komalongekidho osho wo omahala ngoka ge li po. Ngele omusita okuli mefudho, nena oohango odhina okuningwa mesiku limwe. Kapuna shoka tashi imbi,” osho a popi ngaaaka.

Okugwedha kwaashoka, Kashihakumwa okwa popi kutya onkalo oya lunduluka molwashoka mongashingeyi oohango otadhi ningwa nomomukokomoko aguhe gomvula.

“Monale, oohango okwa li owala hadhi kala ko unene muAuguste nenge muDesemba. Ashike ngashingeyi okuza muFebuluali sigo oDesemba, konyala kehe momwedhi otuna mo oohango,” osho a popi ngaaka.

Omusita gwongeleka yaElcin mOngwediva, Aina Sheetheni okwa popi kutya okuwete omwaalu gwoohango odhindji tagu etithwa komwaalu gwaantu mboka ya ninga oyendji mongashingeyi.

“Monale okwa li hashi kumitha aantu ngele oya mono aaholathani yatatu taya hokana mesiku limwe. Sigo oompaka oohango odhindji ndhoka nda hokanitha mesiku odhi li 12,” osho a popi ngaaka.

Amushangandjayi gwoongeleka dhi li kohi yaElcin, Johannes Haufiku okwa popi kutya oongeleka dhi li kohi yaElcin odha ndhindhilike oohango 1 764 mo2022, ashike omwaalu ngoka ogwa shuna pevi kashona okuya po1 596 mo2023 omolwomukithi gwocorona ngoka gwa li ko.Omiyalu kumwe dhaamboka ya hokana mo2024 no2025 kaye dhi na natango.

“Ohatu mono enyanyu enene pethimbo ndika, ashike ando enyanyu ndyoka nali kalelele ngaa muyo nokonima yohango,” osho a popi ngaaka.

“Aantu oyendji otaya hokana, ashike otushishi wo kutya nomwaalu gwaamboka taya hengana ogu li pombanda.”

In an age of information overload, Sunrise is The Namibian’s morning briefing, delivered at 6h00 from Monday to Friday. It offers a curated rundown of the most important stories from the past 24 hours – occasionally with a light, witty touch. It’s an essential way to stay informed. Subscribe and join our newsletter community.