Oilyo yongudu yomilameno noSwapo natango itai tukumwe kombinga yomalunduluko onotwaveta yokuwilika omahangano epangelo yomudo 2025.
Ovatotiveta vamwe inava hala omalunduluko oo taa pulwa a ningwe.
Onotwaveta otai pula okuyandja eenghono komuprima minista Elijah Ngurare dokuwilika omahangano epangelo aeshe, mwa kwatelwa okuulika nokukufa ko oilyo yonguduwiliki paenghundafana neeministeli domondjila.
Omunapaliamente wongudu yoIndependent Patriots for Change Isra Kanyemba okwa anya onotwavata Etivali, ta ti otai nyeke eenghono.
“Ohatu kufa ovanhu ovo ve na oiwino wopailonga eenghono ndee hatu di yandje kovanapolitika.
Itandi anye elunduluko medina lopolitika, ashike ohandi shi ningi shaashi otali nghundipaleke ekalelepo loinima,” osho a ti ngaho.
Kanyemba okwa ti kutya elunduluko otali dulu okulundululila omahangano epangelo moilongifwa yopolitika ponhele yokukwatela komesho omayambukepo opashiwana.
Okwa londwela kutya oshinima eshi otashi toto oshikondo sha nghundipala okupitila mekwatelemo la hapupala lOkabinete nEumbo lEpangelo, osho ta ti ewiliko la nghundipala newiliko lopolitika la pitilila.
Omunapaliamente Vilho Ihemba naye okwa holola elimbililo kombinga yeenghono de lindubila ponhele imwe, ta ti kutya manga onotwaveta tai lalakanene okulongela kumwe nomilandu, otai eta omalipulo kombinga yewiliko la pitilila.
Ashike nee, omunapaliamente woSwapo Clemencia Coetze okwa popila onotwaveta, ta ti kutya otai yeleke omilandu dokulopota nokuxwepopeka elongelokumwe pokati komahangano epangelo.
Okwa ti omalunduluko aa popya kombinga yomikundu deyandjo lomayakulo momahangano oo taa twikile nokumona oimaliwa yepangelo nande kae na eshi taa eta po.
Omupedu minista wounamapya nounaimuna Ruth Masake naye okwa popila onotwaveta, ta ti kutya otai xwepopeke ekalelepo loinima pakuyandja oshinakuwanifa shewiliko keeministeli domondjila ponhele yokukala e li ashike koshi yoministeli imwe.
