Epungulo lyoshimaliwa momukunda olya kutha kohi Foibe Nakashwa sho kwa li a kutha ko omukuli gwoshimaliwa shooN$700 okutota po ongeshefa ye yokuhondja ndjoka mongashingeyi hayi hondjo oondjato dhaanona dhoosikola osho wo oombindja noombulukweya dhuutalala dhaanona, nonande okwa popi kutya etameko okwa li edhigu.
Nakashwa (52), gwomomukunda Oshaaneko moshikandjohogololo shaMpundja moshitopolwa shaShana, okwa popi kutya okwa tameke okuhondja pomimvo 35 sho onkalo kwa li tayi nyengana okumona iilonga.
Okwa lombwele onzonkundaneki ndjika kutya ina mona nande omadheulo ga sha gokuhondja, nokwa gwedhapo kutya okuhondja oshitalenti owala shoka a za nasho.
Omanga ta kondjitha kutya onkalo ota hupu nayo ngiini mokuhondja, okwa waimine ongundu yokupungula yomomukunda moka iilyo hayi umbu nokupungula okashona taya mono, naangoka e li mompumbwe okwa pitikwa okupewa omukuli omushona.
Okwa hokolola kutya okwa li a kutha ko omukuli gwooN$700 nokwa landa eshina lye lyokuhondja osho wo iipumbiwa yalyo.
Okashona hoka oko owala ka vala ongeshefa ye.
“Okwa li nda tameke ongeshefa yokuhondja molwashoka kanda li ndi na iilonga.
Okuhondja inandi ku longwa; ashike shoka oshitalenti ndina,” osho a popi ngaaka.
Mo2013, Nakashwa okwa waimine ehangano lyedhina, Financial Literacy Initiative (FLI), ano opolohalama yopashigwana ndjoka hayi kwathele oohandimwe osho wo aanangeshefa yopevi ya humithe komeho ontseyo nuunongo wopangeshefa.
Opolohalama ndjoka oye mu longo nkene e na okushangitha ongeshefa ye pambelewa, okukwata nawa oshimaliwa she, okukwatathana naantu osho wo okukwatelapo nokunana ookastoma.
Okwa shangitha ongeshefa ye yedhina Ashiwe Trading CC, lwanima omumvo ngoka.
“Onda tameke ongeshefa yandje muuyuni wonale, ashike kayali tayi koko molwashoka kanda li nontseyo yoku yi kokitha.
Omadheulo ngoka nda pewa oga kwathelandje okutseya nkene ndi na okukokeka ongeshefa yandje,” osho a popi ngaaka pethimbo lyomauliko gopaipindi gopashigwana ngoka ga ningilwa mOvenduka oshiwike sha zi ko taga ithanwa National MSMEs.
Nena, Nakashwa okuna omashina omanene gokuhondja nokwa popi kutya okwa thaneka okuhondja oondjato dhaanona yosikola dhoshipa, ndhoka a popi kutya odha kola nonkene otadhi opalele aanona unene tuu pethimbo lyomvula.
Monakuyiwa okwa hala wo okulanda eshina yokushanga iikutu opo a kwate ko ookastoma dhe ndhoka hadhi pumbwa iikutya ya shangwa.
