Onda hala oku uva naanaa kutya okwe shi ningile shike – Dihore

OMVULA ya zi ko, Relestencia Mameisa Dihore (24) okwa kondjele nomukiintu gulwe molwomulumentu nokwa li a tsuwa nekende na konyala a kanithe eho.

Ngashingeyi omulumentu ngoka a kondjelele oye e mu tsu nekatana nokuli ngashingeyi moshipangelo shepangelo shaKatutura. Okwa kundanekwa shoka sha li sha ningwa sho ya li taya tamanana sho ya li taya nu. Sho a li a popi e li moombete, Dihore okwa li ta lili mokuhokolola nkene omulumentu gwomimvo 39 a li e mu ponokele noku mu thiga e mwe ehameka keho sho a li a kanitha oselefona ye omaga ya li taya nu. Dihore ngoka itaa dhimbulukwa naanaa kutya osha li she ende ngiini a ponokelwe nekatana ngaaka molwashoka ayehe oya li ya kolwa nokwa tetwa nee momutse.

“Ekatana okwe li kutha kumumwayinamati shaashi anuwa okwa hala okwoopaleka molugumbo. Kandi shi nee kutya okwe ke li mona ngiini nondi imono ashike nda lala nale mombinzi nonda li ndi shi ote thigi po uuyuni mbuka”, Dihore a tumbula ndhoka. Okwa ti okwe ya a kwathelwe kaashiinda she noya li yi ithana oambulansa noku na okutalwa nawa neshina opo ku talike nkene e ehamekwa naanaa momutse. Dihore okwa ti omuholikemati gwe oye he e ta omboloto poshitaafula shaashi ye osikola okwe ye ethele manga a li mondondo ontimulongo. Okwa ti oya kala miihole naye uule woomvula dhi li ne noya tokolele nee ya kale haya zi pamwe momumvo 2012 ihe okuhepekathana anuwa okwa tameke ngaa omvula ya zi ko. “Onda hala ndi mu mone a lombwele naanaa kutya okwe shi ningile shike”, Dihore a ti ngaaka nokutya wo oku mu tonde na ke na edhiladhilo e mu dhimine po. Dihore okwa ti okwa ponokelelwe kwaangoka a li nale gwomuholikemati gwe ngoka muApilili omvula ya zi ko sho ya li ya tsakanene moKatutura. Okwa ti omukiintu ngoka okwa li taya nyenyeta nomumati gwe ngoka ihe okwe ke mu ponokela sho a li a tokola okuthiga po ehala mpoka pwa li tapu tamanene mbeyaka. Okwa ti nonando a patulula oshipotha, omuholikemati gwe ina tulwa natango miipandeko shaashi ngoka a li po poshiningwanima ine ya puuyelele e shi yelithe nawa.

Okuhepekwa nando kwa tameke nee nale Dihore ina patululila omuholikemati gwe oshipotha nokwa ti omumati e li nawa ihe osho ashike ha nyengwa komalovu. Dihore okwa ti ke na edhiladhilo lyokushuna ko komulumentu ngoka nokwa ti otaka ya kuyinakulu koGobabis hoka a kokela. Edwin Kanguatjivi okwa koleke oshiningwanima shoka nokwa ti Dihore okwa tinda okwa tinda okutulila mo nakumulongela ngaaka ngoka e li ta kongwa ngashingeyi. Kanguatjivi okwa ti nonando Dihore a tindi okutulila mo omulumentu ngoka oshipotha, opolisi otayi ke shi patululila omufekelwa ngoka.

In an age of information overload, Sunrise is The Namibian’s morning briefing, delivered at 6h00 from Monday to Friday. It offers a curated rundown of the most important stories from the past 24 hours – occasionally with a light, witty touch. It’s an essential way to stay informed. Subscribe and join our newsletter community.

The Namibian uses AI tools to assist with improved quality, accuracy and efficiency, while maintaining editorial oversight and journalistic integrity.