Opolifi yaNamibia oya lopota oiningwanima ivali ya yooloka yomadipayo ovakainhu mexuliloshivike.
Eshi okwa li sha shiivifwa molopota yoimbuluma yopolifi yexuliloshivike komupopiliko wopolifi wopashiwana Kauna Shikwambi Oshoondaxa.
She likolelela kuShikwambi, omukainhu (39) vati okwa yashwa nokudipawa kohondamati yaye koOngos moHavana Etitano, omanga moshiningwanima sha yooloka, olutu lomukainhu umwe (41) la hangika momulamba kOkahandja.
Shikwambi okwa ti, oshiningwanima shokoHavana osha ningwa lwopotundi 13h00 mepaandaanda loPeter Nanyemba.
“Otaku tiwa vati omulumenhu, omutamanekwa Omunamibia okwa yasha nokudipaya ohondakadona yaye (38) nombistoli sha landula onghalo yomahepeko omomaumbo ya ninga efimbo,” osho a ti ngaho.
Shikwambi okwa ti omukainhu okwa xulifila opo paningilwa oshiningwanima eshi nomutamanekwa okwa tulwa nale moipandeko noku li konima yekumba.
Ovakwapata vanakufya ova shiivifilwa nale nomakonakono opolifi otaa twikile.
Moshiningwanima sha yooloka, olutu lomukainhu ola hangika momulamba kOkahandja lwopotundi 08h40 Etitano.
“Otaku tiwa vati olutu lomukainhu Omunamibia (41) ole lituwa momulamba kOkahandja komukwashiwana,” opolifi tai ti.
Ovakwapata vanakuningwa oshihakanwa ova shiivifilwa, omanga omakonakono opolifi kombinga yefyo laye taa twikile.
