Omakonakono ga ningwa koshikondo shuukalinawa wiinamwenyo moKarasburg oga koleke kutya mondolopa ndjoka omuna iimuna ya kwatwa komukithi gwekondo nelaka.
Omakonakono gokutala omukithi gwekondo nelaka ga ningwa omasiku ga zi ko oga koleke kutya oongombe 17 ndhoka dha ningilwa omakonakono moshitopolwa shoka sha||Kharas odha monika omukithi gwekondo nelaka, naashoka osha tseyithwa pambelewa komupeviminista muuministili wuunamapya nuuniimuna, Charles Mubita, mOlyomakaya.
Omakonakono gomuule okwa li ga tamekwa momudhingoloko gwaKarasburg sha landula sho kwa li kwa konekiwa iimuna yina omandhindhiliko gomukithi gwekondo nelaka momasiku 22 Septemba.
“Okuza momakonakono 199 ngoka kwa li ga ningwa, iimuna 17 oya monika yina omukithi gwekondo nelaka momudhingoloko gwaKarasburg, “ osho minista a popi ngaaka.
Omakonakono ngoka okwa li ga ningilwa iimuna yomakondo pokati komasiku 22 sigo 25 gaSeptemba mbyoka ya zi miitopolwa ya yooloka moshilongo ngaashi moshitopolwa shaMaheke, oshitopolwa shaKhomas, shaTjozondjupa, shaShana nosha||Karas.
Etukuko lyomukithi ngoka gwekondo nelaka okwa li lya monika lwotango omasiku 22 gaSeptemba mofaalama tayi adhika momudhingoloko gwaKarasburg.
Omakonakono gokolabora giikonakonwa 11 mbyoka ya kuthwa koongombe 65 oyu ulike kutya oongombe 10 odha monika omukithi gwekondo nelaka.
Mubita okwa popi kutya olukongo lwiimuna ya kwatwa okwa li lwa tamekwa mbala konima sho kwa monika iimuna ya kwatwa komukithi gwekondo nelaka mofaalama.
Okwa popi kutya olukongo ndoka olwe eta puuyelele kutya oongombe dhi li ne dhina omukithi ngoka okwa li dha falwa koshitopolwa shaTjozondjupa okuza momudhingoloko gwaKarasburg.
Ofaalama ndjoka yoongombe 65 mwa monika omukithi ngoka osho wo omidhingoloko dhopopepi otamu tonatelwa opo kukeelwe etaandelo lya gwedhwapo.
Uuministili owa popi kutya oondjindikila dhomalweendo goonyama nenge iimuna ndhoka dha tulwa po mongashingeyi otadhi ka kuthwa po uuna kwa manithwa omakonakono gomuule kombinga yetaandelo lyomukithi ngoka.
“Oshizemo shomakonakono ngoka otashi ka gandja ethano kuuministili wu vule okumona kutya openi, ongiini nuunake oondjindikila ndhoka dha tulwa miilonga momasiku 23 gaSeptemba tadhi ka kuthwa po,” osho Mubita a popi ngaaka.
Oondjindikila dhomalweendo giimuna nonyama yiinamwenyo yomakondo okwa li dha tulwa po momasiku 23 gaSeptemba.
Mubita okwa popi kutya aanambelewa yuuhaku wiimuna moshilongo, mwa kwatelwa iikondo yopaumwene noyepangelo, oya hwahwamekwa yi itulemo molukongo lwiimuna ya kwatwa osho wo momakonakono gokutala iimuna mbyoka tayi kwatwa.
Onkalo ndjoka okwa li ye eta uupyakadhi miitopolwa yomuushimba oshiwike sha zi ko konima sho onkundanga ya tameke okwiingaana kutya okwa monika omukithi gwekondo nelaka, sho oositola dhimwe ngaashi mOvenduka dha yapukilwa kaalandi oyendji yonyama omolwuumbanda.
