Omulumentu ngoka ta fekelwa edhipago lyomukalimo gwomOmbaye, Barbara Geschke (80) okwa shunwa mondholongo konima sho a holoka mompangu yaMangestrata gwaMbaye oshiwike sha zi ko.
Omufekelwa Daniel Makie (44) okwa holoka mompangu mEtitano – konima yomasiku gaali sho a tulwa miipandeko. Noshipotha she oshuundulilwa komasiku 29 gaKotoba omanga omakonaakono taga tsikile.
Omudhimba gwa kuku Geschke okwa li gwi itsuwika megumbo lye momasiku 16 gaJuni konima sho aashinda ya kwatwa komalimbililo sho kaayewete omainyengo pegumbo lye noya tameke okuninga omakonakono.
Omupopiliko gwopolisi yoshitopolwa shErongo, inspekta omukuluntu Judith Shomongula okwa popi kutya omakonakono oge eta Makie a tulwe miipandeko momasiku 24.
“Omukalimo ngoka ogwomOmbaye nokwa kwatelwa moKuisebmond konima sho sha monika mo nawa kutya okuna ekwatathano nedhipago ndyoka. Iinima mbyoka kwa li ya yakwa oya monika,”osho a popi ngaaka.
Opolisi inayi tseyitha kutya Makie naGeschke oya li nekwatathano lyoludhi luni ishewe inayi yelitha uuyelele womuule kombinga yedhipago ndyoka.
Makie okwa patululilwa oshipotha nokwa tindilwa oboloha sho a holoka mompangu.
Opolisi inayi gandja uuyelele kutya iinima yoludhi luni kwa li ya yakwa megumbo lya kuku Geschke ashike oya koleke kutya iinima mbyoka oya monika sho Makie a tulwa miipandeko.
Moshiningwanima sha yooloka, omulumentu gwomimvo 30 omvalele yaZambia okwa mana oondjenda sho a si omeya momulonga, sha ningwa moshitopolwa shaZambezi mOlyomakaya.
Pauyelele wa gandjwa komupopiliko gwopolisi moshilongo, omupevikomufala Kauna Shikwambi, okwa popi kutya nakusa okwa hololwa kutya oye Nambula Saboya gwomimvo 30.
Oshiningwanima shoka osha ningilwa momukunda Libula ethimbo lyongula pethimbo nakusa kwa li ta kambadhala okutaaguluka omulonga.
“Otaku hokololwa kutya nakusa okwa li nookuume ke yaali sho kwa li taya kambadhala okutaaguluka omulonga nokawato okuza komukunda Kalimbeza yu uka koLubula.
Okawato oka tenguka noya gwile momeya. Ookuume ke yaali oye shi pondola okuyoga sigo okomutunda ashike nakusa okwa sile mo.
Aapambele ye oya tseyithilwa nale onkundana yoluhodhi,”osho Shikwambi a popi ngaaka.
