Ondjila yolutenda yeekilomita di li o57 pokati kOndangwa nOshikango, oya ninga omido di dulife pumbali inai enda eshina lokolutenda.
Ouyelele ou owe likolelela komupopiliko wOministeli yOilonga nOyeendifo Tangi Shivute, oo ta ti omumbwe yomayakulo omashina okolutenda kOshikango oyo ya eta omashina a kale ihaa longifa ondjila ei.
Shivute okwa ti olutenda eli ola ya meemiliona di li N$608 ndee kadi li N$329 ngaashi sha lopotwa koThe Namibian onghela.
“Shaashi ashike okututa omitwalo okuya kOshikango itaku shiva paife pangeshefa itashi imbi oministeli i tule moilonga oinima ikwao ya fimana,” Shivute ta ti.
Omanyamukulo aye ee ya konima yomapopyo kutya olutenda olo kwa li la kwatelwa komesho kupresidente mukulu Sam Nujoma, kali na eshi tali longo, nomashina vati aa ninga omido mbali paife inaa ya ko kOshikango.
Shivute okwa ti TransNamibia ota dulu okutameka okulongifa ondjila oyo ngee omitwalo oda ningi dihapu fiyo opondodo yomayakulo opangeshefa.
“Ngee omitwalo dokuya kOshikango da ningi dihapu, TransNamib oku na okutala koilonga nongeshefa yomashina okolutenda okuya kOshikango,” osho a ti ngaho.
Okwa endulula kutya omashina paife ngaha ihaa i kOshikango shaashi kapu na omitwalo da wana da yuka kodoolopa oko.
“Eshi osha etifa TransNamib aha dule okuya komesho nokulongifa omashina mondjila ei,” Shivute ta ti.
Natango, omupopiliko woTransNamib Alina Garises okwa lombwela oThe Namibian kutya ondjila ei oye lixula okulongifwa momafiku 12 Juli 2024.
Olutenda okwa li la patululwa kupresidente mukulu Hifikepunye Pohamba momudo 2012.
Nande opa kala puhe na omashina efimbo lile, ehangano lomashina okolutenda lepangelo ola ti omayakulo okuya kOshikango inaa kalekwa natango.
“Oshikango oshi li onhele yokufikila oinima shaashi oipindi natango pokati kaAngola naNamibia tai twikile okuya komesho,” Garises ta ti.
Okwa weda po kutya eenghundafana odi li metifa dokukonga omitwalo okuuya nokudja moshilongo, nomayakulo omashina okolutenda moNamibia aa teelelika a ka dane onghandangala mokututa omitwalo edi.
Garises okwa ti olutenda okwa li la totwa li yambidide oipindi pokati kaNamibia naAngola.
“Ashike nee, oinyangalwa yopaipindi kOshikango oya shuna pedu neenghono okudja pOkolona, osho sha eta omayakulo omashina okolutenda a ninge a shona,” osho a ti ngaho.
TransNamib okwa ti ondjila natango otai dulu okulongifwa.
“Olutenda pokati kOndangwa nOshikango natango oli li monghalo iwa,” Garises ta ti.
Okwa ti kutya natango olutenda eli otali dulu okukwatakanifa Angola naNamibia.
