Oministeli yOunamapya nOunaimuna, Eeshi, Omeva nOmatendululo Omadu oya tameka oshikonga shokukufa po eedalate odo da tulwa kedu laaveshe shihe li paveta.
Eshi okwa li sha shivifwa komupopiliko woministeli Romeo Muyunda momukanda woikoikundaneki Etitatu.
“Oshikonga eshi oshi li ombinga yoilonga yoministeli i li metifa yokwaamena oufemba wedu laaveshe, okwaamena eenhele doulifilo nokukwashilipaleka kutya edu laaveshe ola mangulukila okulongifwa kukeshe umwe shi li paveta,” Muyunda ta ti.
She likolelela komupopiliko, opolohalama oya tameka moshitopolwahoololo shaMaheke manga inai ya koKavango Ushilo noKavango Uningino ndee paife oya uka kOshikoto.
Oshikonga eshi otashi ka ningwa oshilongo ashishe.
Okudja momudo 2025, eedalate nhano dihe li paveta da kondeka eehecta di li kwopo4 000 moshitopolwahoololo shaKavango Ushilo oda kufwa po, omanga mbali dawedwa po oovene vado ovo vene ve di kufa po konima va udafana noveta.
Moshitopolwahoololo shaKavango Uninginino, eedalate nhatu dihe li paveta da dingilila edu leehecta o2 914 oda kufwa po, omanga mbali kwa li da kufwa ko mOmaheke.
Omupopiliko okwa ti oshikonga shopaife mOshikoto osha teelelika shi hanaune po eedalate mbali dihe li paveta.
Muyunda okwa pandula ehangano lomayakulo ovanyasha laNamibia eshi la vatela mokukufa po eedalate edi dihe li paveta, ta ti oilyo yalo oya yambidida nawa nonelitulemo opo opolohalama ei i pule nawa komesho.
Oministeli oya indila ovalongifi vedu laaveshe va pule epitikilo komalelo opamufyuululwakalo nonguduwiliki yomadu manga inava tula omadu eedalate.
