Oministeli yOilonga nOyeendifo oya ekelashi omapopyo taa lotauka nomalungula kutya otai kufa po omainda oo ya tula mopate koWestern Bypass mOvenduka.
Omukulunhuwiliki woministeli Jonas Sheelongo okwa lombwela oThe Namibian onghela kutya osho oshiwana sha hala kashi shii okukufa po omainda, ashike “okuxulifa po okutula po omainda”.
Omainda okwa li a tulwa po petameko lomwedi, mopate yoB1 Western Bypass ongombinga yeenghendabala tadi lalakanene okuninipika oiponga nomafyo ovaendi vokolupadi.
She likolelela koRoad Authority, opoloyeka oya pula oshimaliwa shi fike lwopoN$704 000, sha kwatela mo okutula po omainda, omadidiliko omopate nokututa oinima.
Oshinima eshi otashi kondjifwa momhangu komunandjungu Michael Amushelelo, oo a ninga eindilo lomeendelelo kOmhangu yoPombada yaVenduka oshivike sha dja ko.
Amushelelo ota pula omhangu i yandje elombwelo tali popi kutya omainda oo kae li paveta nokufininika epangelo li a kufe po koWestern Bypass.
Oshipofa osha teelela omafiku 30 Juni konima yokupwilikina eemhata okudja kuAmushelelo novakalelipo vepangelo.
