Konima yomumvo gumwe gwa piti po sho Roswinds Fabianu (6) a kwatwonkonga nokudhipagwa mOkahandja, ofamili ye oya thigwa nomadhiladhilo kutya sha kalako okuuva owala uuyuuki wa longelwa okanona kawo.
Ashike peha lyaashoka, iilalo oya tolokanwa sho ya adha ombila yakanona ya fikwa.
Inandi shi nyanyukilwa nande.
Itandi vulu nokuli nokutongonona shoka nduuvite ngashingeyi.
Onda kala netegameno opo nakudhipaga omumwandje a tulwe miipandeko nohandi kala nokugalikana shi ningwe.
Ashike ishewe omwaashika sha ningwapo,” osho yina yaRoswinds, Helaria Nghipunya a popi ngaaka.
Nghipunya, ngoka hazi koRehoboth, okwa popi kutya okwa nongele oshiningwanima shoka okuza kumumwayinagona gwokOkahandja sho a tula ethano koWhatsApp momasiku 25 gaApilili, okudhimbulukwa uule womumvo gwa piti po sho omwana a mana oondjenda.
“Mumwamemegona okwa yamukula nokulombwela ndje kutya okwa li a talelepo omawendo nombila(yokanona) itayi monika nande nawa,” osho a popi ngaaka.
Esikululo lyemanya lyaRoswinds okwa li lya ningwa momasiku 18 gaSeptemba omumvo gwa zi ko, mesiku ndyoka kwa li e na okutyapula evalo lye lyomimvo heyali.
“Sho mumwamemegona a yi komawendo, okwa adha ombila ya fikwa.
Okwa pula sekuliti kutya oshike sheende po, nokwe mu yamukula kutya oya fikwa kaantu ya li taya fike eyoka. Ina pula we uuyelele wa gwedhwapo.
Okwa thaneke omathano nokwe ga tuminendje,” osho a popi ngaaka.
Okwa popi kutya oya tokola ya ka patulule oshipotha kopolisi omolwoshiningwanima shoka shombila.
“Onda popi nagumwe gwomoomemegona gwandje, nokwa ti kutya natu popye namayola gwaKahandja.
Sho nda landula oshinima shoka konima yomasiku, okwa lombwele ndje kutya mayola ina yamukula ko sha natango koshinima shoka,” osho Nghipunya a popi ngaaka.
“Ondiwete opolisi itaayi longo neitulomo okutula miipandeko nakudhipaga.
Kapuna shoka tashi ningwa po kombinga yoshipotha shoka. Oya mwena owala ishewe ihaya kwatathana natse,” osho a popi ngaaka.
Roswinds okwa li a lopotwa a kana momasiku 24 gaApilili 2025 konima sho a kana tayi kosikola okuza kegumbo momudhingoloko gwaKlein Saamstaan mOkahandja.
Yinagona gwe, Roswinds Ernestu, okwa popi kutya ofamili onkene tayi lili esiku kehe. “Aakalimo yomOkahandja otaye tu ehameke noonkondo,” osho a popi ngaaka sho ishewe ombila yokanona ya fikwa.
Hekulu gwaFabianu, Nghidipo Vatilifa, okwa popi kutya okwa tseya kombinga yombila ya yonagulwa sho a tseyithilwa omanga a li konooli yoshilongo.
Okwa popi kutya inaya ko natango komawendo a ka tale nomeho ge shoka a mono momathano a tuminwa.
Oshiningwanima shoka osha geyitha woo aakalimo yamwe yomOkahandja.
Omunashipundi gwongundu yina sha niipambele yaakalimo yomOkahandja, omunandjungu Seth Gariseb, okwa popi kutya efiko lyombila ndjoka olya fulula ko omaindilo opo ku kondjithwe uuyuuki osho wo egameno lyi li hwepo lyi longwe moshinima shoka.
“Inatu shi nyanyukilwa molwashoka onkene kaatushi ngoka a dhipaga okanona nongashingeyi omuntu gumwe okwayi eta fike ombila ye. Otashi lulumike komutima ofamili osho wo aakwashigwana,” osho a popi ngaaka.
Omupopiliko gwondolopa yaKahandja, Master Pena, okwa popi kutya muni ina tseyithilwa nande oshiningwanima shoka.
“Okuza kumuni tse oshinima shoka katushishi. Ofamili kutse inayi thika ko,” osho a popi ngaaka.
