Ovatamanekwa vanhe ova tulwa moipandeko moSouth Africa moshikandjo shaGauteng konima va hangika neendjebo deeAK-47 hetatu nomakoto e li aheyali ehe na sha kopolifi pefimbo kwa li tai patolola.
Ouyelele wa pitifwa kopolifi yaSouth Africa komalungula owa ti, ovatamanekwa okwa li va kwatwa po Etivali konima eshi va hangika neendjebo moMagaliesburg.
Opolifi oya ti ovanambelewa vopolifi va dja koMagaliesburg okwa li tava shiike mondjila yoR24 momafiku 16 Juni ndee tave litu ololi yoVolvo i na onomola yaNamibia ya fikama komunghulo wopate, nokahauto kashona kokaMazda ke li konima yayo.
Ovanambelewa vati ova mona ovalumenhu vavali tava kufa oshako mololi ndee tave i tula konima yokaMazda.
Oshinima eshi osha tukulufa efeekelo , olo la eta opolifi i ka ningile oyeendifo oyo okahanda.
“Ovanhu aveshe ovo va li moyeendifo omu okwa li va kwatwa po meendelelo ndee tava patululilwa oshipofa shokuumbata eendjebo dihe na omikanda,” opolifi yaSouth Africa osho ya ti ngaho.
Ovatamanekwa ova teelelika va yandje omauyelele avo manga omakonakono taa twikile.
Opolifi oi na yo okutuma eendjebo edi ya kwata ko di ka konakonwe ku talike ngee oda longifwa moimbuluma yonhumba.
“Eendjebo otadi ka konakonwa paunongononi ku talike ngee oda longifwa moiningwanima yoimbuluma,” opolifi yaSouth Africa osho ya ti ngaho.
Opolifi inai popya nande oukwatya noukwashiwana wovatamenekwa.
