Okomisi yomahoololo yaNamibia yedina Electoral Commission of Namibia (ECN) oya lombwela eengudu dopolitika di longife oimaliwa yado vene di ye koSouth Africa di ka tale nghee eembapila domahoololo tadi ndulukwa.
Oshinima eshi oshe ya konima yoshoongalele pokati kokomisi yomahoololo neengudu dopolitika kwa li sha ningwa momafiku 14 Oktoba inashi enda nande nawa konima kwa li da lombwelwa kutya okomisi otai futu ko ashike etata.
“Otwa hala okomisi yomahoololo yaNamibia i fute olweendo lokuya koSouth Africa.
Inatu hoolola ehangano lokoSouth Africa, ndee ngaashi shito, ECN oye e na okufuta oinima aishe.
“Okuninguluka paife konima kwa li va longifa oimaliwa imwe momahoololo a wedwa po itashi tambulwa ko,” hamushangandjai wongudu yoPopular Democratic Movement Immanuel Ngaringobe, oo kwa li omunashipundi woshoongalele osho kwa li sha ya eengudu adishe dopolitika moNamibia Etitatu, osho a ti ngaho.
Okwa ti oshinima eshi otashi ti kutya omahoololo okwa tokolwa nale ngee eengudu oda kala inadi tala nawa eshi eembapila domahoololo tadi ndulukwa.
Omunapaliamente wongudu yoLandless People’s Movement Eneas Emvula okwa ti etokolo eli inali fimaneke eengudu dopolitika noudemokoli.
“Ovo oolyelye ve u ye ndee tava ti kave na oimaliwa va tume eengudu dopolitika di ka konakone, ndee natango okwa li va faneka omahoololo a wedwa po oo kwa li inee lilongekidilwa? Omukulunhuwiliki wokomisi yomahoololo naku fwe moilonga.
Okomisi yomahoololo nai konge oimaliwa i tume eengudu edi dopolitika,” osho a ti ngaho.
Eengudu oda ti ngee ECN okwa twikile noshinima eshi, otadi lombwele ovayambididi vado vaha kufe ombinga momahoololo.
Okomisi yomahoololo Omaandaxa okwa li ya shiivifa kutya oya yandja otendela yokuninga eembapila domahoololo omalelo oitopolwahoololo needoolopa kehangano ledina Uniprint Global koSouth Africa yongushu yeemiliyona di li N$4.8.
