Epangelo ola kaleka otendela yeemiliona di li N$40 oyo kwa li ya pewa ehangano laAmerica loungoba wounamapya nounaimuna opo li kale tali wilike oikunomwa paungoba oshilongo ashishe, konima Okabinete ka pula otendela ei i kalekwe meendelelo.
Etokolo lOkabinete, la ningwa oshivike eshi, ola eta omalimbililo kombinga yokulidopa meetendela depangelo odo ovanapolitika va kala nokupopya kutya ihava kufa ombinga mudo oule weedula.
Otendela oyo kwa li ya pewa ehangano ledina 6th Grain Corperation muJuni okwa li tai lalakanene okulongifa oilongifo yopauteknika i wilike oikunomwa ya fimana yaNamibia ngaashi epungu, omahangu noilyavala.
The Namibian okwa uda kutya Okabinete oka yandja elombwelo koministeli younamapya i kaleke otendela ei.
Eshi a nyamukula omapulo oThe Namibian Etitatu, omupopiliko woministeli Romeo Muyunda okwa koleka kutya otendela ei oya kalekwa, ta ti eudafano kakwa li la ningwa kwa landulwa omilandu adishe da pumbiwa.
“Oministeli oya hala okulombwela oshiwana kutya epangelo ola kaleka pambelewa otendela yomayakulo opaunamapya oyo kwa li ya yandjwa ko6th Grain Corporation i tule po osystema yokuwilika oikunomwa yopaungoba.
“Etokolo ola landula omatalululo konakono eudafano noikumungu ya kundukida exulifo layo.
Omatalululo aa mona kutya eudafano inali wanifa po omilandu da pumbiwa dopaveta ngee taku ningwa eudafano ponhele yepangelo,” osho a ti ngaho.
Muyunda okwa ti omukanda wekaleko lotendela ei owa tumwa nale kehangano oko.
Okwa weda po, “Epangelo ola longifa eeveta dokuningulula eudafano nola yandja omukanda tau popi kombinga yekaleko eli ko6th Grain Corporation,” osho a ti ngaho.
Muyunda okwa ti etokolo eli ola ningwa kwaamenwe omauwa epangelo nokukwashilipaleka kutya keshe eudafano tali ningwa ponhele yepangelo ola ningwa kwa landulwa eeveta.
Omikundu dimwe ode di kutya Okabinete kakwa li ka kundafanwa nako, mwa kwatelwa omapopyo kutya Inge Zaamwani kakwa li a uda etokolo eli la ningwa kombelewa yomukulunhuwiliki.
Okudja opo Zaamwani okwa nyamukula komanyenyeto ovanafaalama kutya ke na eshi e shii kombinga yetokolo eli nomukalo oo wa landulwa meyandjo lotendela ei.
Eshi kwa li ta popi noThe Namibian oshivike eshi, omupopiliko wongudu yoPatriots for Change (IPC) Imms Nashinge okwa ti Okabinete oka ninga etokolo liwa kombinga yoshikumungu eshi.
Okwa ti okuyandja otendela yoikulya i kale tai wilikwa kehangano lokondje otaku eta omalimbililo kombinga yeameno lopashiwana.
“Opoloyeka aishe kaiwa koshilongo, oshiwa unene eshi Okabinete ka kaleka otendela shaashi kaiwa koshilongo.
Oinima ya pamba oikulya oi na sha neameno lopashiwana nonghee nee inai pewa omahangano okondje,” osho a ti ngaho.
Nashinge okwa ti Ovanamibia ovo nava kwatele eetendela di li ngaho komesho.
“Oshinima osho nashi ningwe kovanhu vetu. Kashi li mondjila tu yandje ongeshefa kehangno lokondje, nai longwe kOvanamibia noshiwa unene eshi va pwilikina kufye.
Epangelo nali kale la tonata kombinga yomatokolo inaa kolekwa kOkabinete, unene ngaa omatokolo oludi eli oo taa ningwa she likolelela koveta.
“Eshi otashi ulike kutya minista ota longo oilonga yaye nomapuko a tya ngaho inaa endululwa nepangelo nali kale olo tali ti ndee tali amene oshilongo shetu. Onghatu iwa lela,” osho a ti ngaho.
Oshinima eshi oshe ya moshiwana konima ombelewa yaAmerica ya tulika kepandja layo lomalungula kutya ehangano ola pewa otendela.
Ombelewa oya ti elongelokumwe otali holola nghee outeknika wopombada waAmerica, owino welineekelwa neyandjo lounongo waalushe tali dulu okuvatela okuyambula po oshikondo shounamapya shaNamibia.
Omukulunhuwiliki wo6th Grain, Vlad Eskin omwedi wa dja ko okwa lombwela oThe Issue kutya ehangano ola ninga keshe osho sha pumbiwa nola kala nokuyandja omadilaadilo alo koministeli okudja muJuli odula ya dja ko.
Okwa ti okwa yandja omadilaadilo ehangano kewiliko loministeli omudo wa dja ko.
Eshi osha eta oministeli i shaine eudafanotwokumwe no6th Grain, opoloyeka oyo tai longifa oimaliwa ya yandjwa omaano, ndee itai ka longifa nande oimaliwa yovafuti voishoshela.
Eskin pefimbo opo okwa li a udaneka kutya otava ka yandja outeknika kepangelo laNamibia oo tau pitike ewiliko loikunomwa paungoba.
