Ofamili yokaana oko ka xulifa moshipangelo shaRundu oya hala okufutifa epangelo konima ovapangi vati va teta okaana pefimbo taka dalwa.
Okaana kokakadona, oko kwa li ke na oivike ivali, okwa li vati ka tetwa komutwe pefimbo taka dalwa momafiku 14 Auguste eshi ovapangi kwa li tava kendabala okuwedela meme wako.
Oministeli yOundjolowele nOmayakulo Opanghalafano oya koleka oshiningwanima eshi Etitano koThe Namibian.
Ashike, nande ongaho, oya ti efyo lokaana ola etwa koinima ya pamba oupelema naikwao imwe.
Omunambelewa wopaunamiti akula oshinima eshi okwe shi koleka koThe Namibian Oshoondaxa.
Omunambelewa nande ongaho, okwa ti eshi hasho sha etifa efyo lokaana, ashike okwa anya okuyandja ouyelele wa wedwa po kombinga yoshikumungu eshi shaashi kashi shii oshinakuwanifa shaye.
Xekulu yokaana, Johannes Lyevera (50), Oshoondaxa okwa lombwela oThe Namibian kutya ofamili mwa kwatelwa, ina yokaana, okwa li ashike va lombwelwa kombinga yoshipute shokaana konima yomafiku atatu eshi ka dalwa nokwa li va anyenwa oku ka mona.
“Ohatu va futifa. Ove na okufuta.
Oko okwa li okaana kofamili yetu, ashike ove ke tu kufa,” osho a ti ngaho.
Omafano oo a monika koThe Namibina otaa ulike oshipute sha hondjwa mombaba yoshipala yokaana.
Lyevera okwa ti ovapangi okwa li ve na okuwedela meme wokaana shaashi oku na ashike eedula o18.
“Ove mu teta shaashi okaana kakwa li taka piti voo okwa li vali tava ka yakula ovakainhu vamwe ve li momateelelo,” osho a ti ngaho.
“Inatu hafela oshipute. Itava dulu okuteta okaana ketu ndele itave tu lombwele meendelelo.
Osha puka,” Lyevera ta ti. Okwa ti ofamili otai kundafana nahaende opo i kufe onghatu yopaveta.
Omupopiliko woministeli Walters Kamaya okwa ti ina yokaana okwa li a pewa exungomwenyo pamwe naxekulu wokooina konima yefiku eshi okaana ka dalwa noundjolowele wako, mwa kwatelwa oshipute shokomutwe, okwa li we likundwa meenghundafana.
Okwa ti okwa li yo vali kwa yandjwa omayakulo exungomwenyo a wedwa po momafiku 20 Auguste, omo kwa li onghalo youndjolowele wokaana ya kundafanwa.
“Okaana okwa li ka dalwa omafiku inaa fika nokwa li ke na oupyakadi wokufuda nonghee nee okwa li ka tambulwa koshikondo shomayakulo ounona ovo opo va dalwa ke li komipepo.
Ei onhele ya gambekwa ihai i keshe umwe,” Kamaya ta ti.
Okwa ti onghalo yokaana nosheetifi shefyo okwa li sha kundafanwa pefimbo lexungomwenyo naina yako naxekulu wokooina momafiku 28 Auguste omanga kwa li vali sha ningwa nofamili yokooxe mulotete laSeptemba.
“Ofamili oya holola kutya oya tambula ko nawa exungomwenyo nomafatululo osheetifi shefyo, osho kwa li shihe na mo sha moshipute,” Kamaya ta ti.
Okwa ti oministeli noshipangelo ove litula mo meenghundafana dopauyelele novanaudu neefamili, ndee ta yandje omahekeleko kofamili ponhele yoministeli.
Olopota younamiti kombinga yoshiningwanima eshi, oyo oThe Namibian ya mona, oya ti okaana okaxulifa shaashi okwa li ke na oilyo imwe itai longo molwombakiteli.
