Kominisina Andreas Shilelo kOshana okwa ti opolifi otai konakona omapopyo kutya omunambelewa wopolifi ta konakona oshipofa shekengelelo leemiliona N$2,1 koSanlam okwa tameka okupula oihole komutamanekwa womukainhu moshikumungu omu.
Shilelo okwa lombwela oThe Namibian onghela kutya omapopyo aa okwa li tete a lopotelwa okomisi yokulwifa oulingilingi yoAnti-Corruption Commission (ACC), oyo konima ya tumina oshikumungu eshi kopolifi.
“Opu na omapopyo kutya omukonakoni wetu, pefimbo lomakonakono, okwa tameka okuhola.
Omapopyo a tya ngaha okwa li a lopotwa koACC.
ACC okwe a konakona ndee taa tumine kopolifi, paife opolifi otai konakona i mone ngee oku na ngaa oushili nongee aa xwaxwameka omulandu wokuditika,” osho a ti ngaho.
She likolelela kuShilelo, omunambelewa ou ta popiwa oumwe womwaavo tava konakona oshipofa shekengelelo loSanlam nokwa kala nokukundafana nomutamanekwa pangodi manga ta ongele ouyelele wa pumbiwa momakonakono.
“Okwa li ta hade ouyelele kombinga yomutamanekwa.
Osha lundulukila meenghundafana dopangodi omo omunambelewa kwa li ta holo ndee omutamanekwa ta twala oshikumungu eshi koACC,” Shilelo ta ti.
Komisina okwa ti ouyelele wopetameko wa ongelwa kokomisi yokulwifa oimbuluma owa ti opu na ouyelele kombinga yeenghundafana.
“Moshipofa eshi kondadalunde, opu na ouyelele umwe kombinga yeengodi shaashi ongodi okwa li ya longifwa.
Eshi oACC ya mona ouyelele, oya landula oshikumungu eshi ndee tava mono ouyelele kombinga yomakwatafano aa,” osho a ti ngaho.
Shilelo okwa ti opolifi oya tambula ko oshipofa okudja koACC novakonakoni ve lifikamena okudja kondje yoshitopolwahoololo otava ka ulikwa kukomufalandjai wopolifi yaNamibia.
“Kombinga yopolifi, ohatu ti otwa tambula ko oshipofa eshi okudja kokomisi yokulwifa oulingilingi nohatu ulike ovakonakoni ve lifikamena okudja kumwe ku lili va konakone oshipofa shomutamanekwa kombinga yomukonakoni ou,” osho a ti ngaho.
Natango, Shilelo okwa londwela kutya ovatamanekwa vamwe va mangwa po shi na sha noshipofa shekengelelo loSanlam ova nyenyeta kombinga yovakonakoni, osho ta ti otashi dulika shi kale ashike omukalo wokupiyaaneka omakonakono oshimbuluma eshi.
