Omutumba wOpashiwan Etitatu owa tokola woongale nena opo u manife eemhata odo di li momusholondodo woikundafanwa yopaliamente manga inai ya mokafudo.
Etokolo eli ola landula eindilo lomeendelelo la ningwa komuwiliki wovanapalimente voSwapo Alpheus !Naruseb a pula opo va ongale fiyo onena.
Ewedelo eli ole ya konima ovatotiveta vongudu tai pangele neengudu domilameno va dopa okumanifa oikumungu ya fimana.
Eshi osha kwatela mo ekoleko laGerson Sindano ongomunashipundi wOkomisi yOmahoololo yaNamibia, sha landula eshi a ulikwa kupresidente Netumbo Nandi-Ndaitwah.
Opaliamente natango inai koleka euliko laBryan Eiseb ongomukulunhuwiliki wOkomisi yOkulwifa Oulingilingi, okutala kewedelo loshikako shaErna van der Merwe ongomupedu kulunhuwiliki wOkomisi yOkulwifa Oulingilingi nokuninga etokolo kombinga yehoololo loilyo yopaliamente ivali i waimine Okomisi yEameno.
Omutumba wOpashiwana ohau ongala Etivali fiyo Etine, manga Omaandaxa haa kala noyoongalele yeekomitiye.
Omuleli wongudu yoPopular Democratic Movement (PDM) McHenry Venaani okwa yambidida ewedelo lomutumba, ashike okwa ti efiku limwe alike inali wana okuungaunga noikumungu oyo inai manifwa mopaliamente.
Okwa indila ovatotiveta vakwao va fimaneke oinakuwanifa yavo yopaliamente ndee ta pula etomeno lokafudo kalekale, ta ti eekomitiye dopaliamente kadi na oimaliwa di ka wanife po oilonga yado pefimbo lokafudo.
“Epulo olo twa pumbwa okulipula atushe ole li, omolwashike hatu ile mokafudo ngee katu na oimaliwa yoku ka longa osho tashi tu twalifa mo?” osho a pula ngaho.
Opaliamente oya teelelika i ye mokafudo nena ndee tai ka aluka muSeptemba.
Venaani okwa pula opo eumbo li wedele ko oshivike opo va ye nawa mokafudo ndee tava aluka vali manga ku na oshivike shimwe muSeptemba va manife oinima oyo inai pwa.
Okwa anya yo omapopyo kutya eengudu domilameno odo da kateka oinima oyo inai manifwa.
“Kashi shii etomeno oo.
Osho oufemba wefinamhango olo natango tali pula opaliamente i pule epangelo li kalele po oinima,” osho a ti ngaho.
Ta pula ovatotiveta ve litulemo, Venaani okwa ti: “Ngee otwe litula mo moilonga, oshilengifa nai omunhu ta futwa osho hatu futwa molwoilonga ei hatu longo ponhele yovanhu.”
– NAMPA
