Nust okwa tambula ko ounona ovo ve na ondodo 11

OSHIPUTUDILO shedina Namibia University of Science and Technology (Nust) osha ti oshe lilongekida okutambula ovalihongi ovo va pita ondodo 11.

Omukulunhuwiliki ta vatele waNust Nashilongo Gervasius okwa ti oshiputudilo otashi pula omunhu a kale e na oitwa 25 moilongwa itanho opo a dule okutambulwa.

Gervasius okwa ti, ovalihongi vaNust ohava tambulwa she likolele kutya ova pita ngahelipi, osho hashi talika pakuvalula oitwa oyo va mona.

“Ashishe kumwa, Nust okwa tambula ko ovaningi vomaindilo ovo ve na ondja po yondodo 11 ya tambulwa ko kolutu lomakonakono opashiwana.
Eshi osho unene sha fimana kushe opo t uku tambule,” Osho a ti ngaho momukanda wa pitifwa Etitano.

Oshinima eshi oshe ya konima oUniversity of Namibia (Unam) ya ti itai ka tambula nande ovanhu ve na ashike ondodo 11, shaashi inave lilongekidila nawa ehongo lopombada.

Omukulunhu wehangano lopashiwana lomayambulepo ehongo Patric Simalumba okwa ti okatendo kopaliamente oko ka tota po Unam taka ti ondjapo yondodo 12 oya pumbiwa opo omunhu a ye koshiputundilo, oka puka.

Simalumba, oo kwa li ta popi koDesert FM Omaandaxa okwa ti ovatoti okwa li ve li mondjila efimbo opo, ashike paife osha puka shaashi kapu na vali ondjapo yondodo 12.

Simalumba okwa ti vali, onghalo oyo i li koUnam oya pumbwa okuudika ko pakutala kosystema aishe yehongo nomadeulo opo mbada.
Okwa weda po vali kutya ovo inave shi pondola okuya kondodo 12 inava dopa, ngaashi ovanhu va itavela.

Okwa ti ondodo 11 oyo ondodo yotete yokuya mosystema oyo ya lundululwa noshi li sha puka okutya ounona ovo inava ya kondodo 12 ova dopa.

“Ovo ve na ondjemo ya pumbwa okuwedelwa, otava dulu okushi ninga koiputundilo oyo hai yandje eetundi odo, mwa kwatelwa noNamibian College for Open Learning,” Simalumba osho a ti ngaho.

Simalumba okwa ti Namibia oku na oiputundili yopaungoba i li 64 ya nyolifwa nomahngano aeshe a pumbiwa.
Okwa ti oiputudilo ei oi yadi eenhele dovanhu ovo va dja mondodo 11.

“Nande ohashi pula efimbo, eendado dayo. . . oikwafifo yado, otava dulu okupitila oko,” Osho a ti ngaho. Omuleli wovanyasha Bernard Kavau okwa ti Unam ote lipopile neepolohala omo ounona ve na ondodo 11 ve na okupitila tete opo va longekidilwe nawa eepolohala daasho va hala okulihongela.

Okwa ti odula ya dja ko oshiputudilo okwa li sha tambula ovalihongi ve na ondodo 11 ve dulife po1 000 ovo kwa li va mona eetundi dopetameko, ndee ngee oshiputudilo otashi ti itashi kufa ovanhu ve na ondodo 11, osho osha nyika oshiponga.

“Otave lipula kutya ohatu ka tula ovalihongi ava omayovi peni ovo inava ya kondodo 12? Inashi pumbiwa ashike nandenande, kashi na etomeno noita shi shiva nandenande,” Kavau osho a ti ngaho.

Okwa ti eshi omilandu edi kwa li da ningwa, keshe umwe okwa li a lombwelwa, onghee nee epulo ole li apa kutya oshike Unam inaanya omulandu wokuninga ondodo 11 yaxuuninwa.

“Itatu yambidida nande oshinima eshi. . . shama ashike Nust noiputudilo imwe tai tambula katu na ko nasha lela,” Kavau osho a ti ngaho.