Denga Ndaitwah okwa patulula pambelewa ehangano ledina Denga Epaphras Ndaitwah (DEN) Impact Foundation opo li ungaunge nomikundu dopanghalafano nehongo tadi hapupala odo da taalela ovalumenhu novamati mOvenduka Etivali.
Eshi kwa li ta popi pepatululo, Ndaitwah okwa pandula oshikondo shounghulungu eshi sha yandja edina nokuyeleka oshinakuwanifa shehangano.
“Nande ehangano ihali mono omutengenekwafaneko wepangelo, oli na oshinakuwanifa shokupopila oshiwana osho tashi mono oixuna,” osho a ti ngaho.
Okwa ti opolohalama otai ka ungaunga meyukililo nomikundu dehongo di li moindjemo yomapekapeko a ningwa koUniversity of Namibia (Unam).
Ouyelele wa yandjwa kuFaustina Neshila womongudu yovapekapeki yoshiputudilo owa holola kutya ovalihongi ovo va mona eedjapo neudo vahapu ovakainhu moiputudilo yakula moshilongo.
Ta weda po kutya omwaalu uhapu wovanyasha ovalumenhu otau fiye po ehongo ndee tau tameke okuninga oimbuluma, Ndaitwah okwa pula kuningwe “elunduluko” la endelela opo kukelelwe ovanhu ovo vehe na eshi tava ningi vaha tanaukile mokuninga oimbuluma.
Ashike nee, okwa popya kutya okuyambidida ovanyasha ovalumenhu inaku ya moshipala eyokomesho lovanyasha ovakainhu.
“Otu lile po ovamati, kashi shii okukondjifa oukadona, ashike ongovakufimbinga meyokomesho laaveshe,” Ndaitwah ta ti.
Ta endulula etumwalaka eli, omuprima minista Elijah Ngurare okwa kwashilipaleka oshiwana kutya ehangano lipe otali wedele ashike eyambidido loukadona olo li li po nale.
“Ovamati nava kale ve udite va kwatelwa mo nove wetike,” Ngurare ta ti, ta tu ovanyasha vovalumenhu omukumo va shune mehongo nomounamapya nounaimuna.
