Presidente Netumbo Nandi-Ndaitwah okwa shiivifa omafaneko okuulika ongudu vatatu vowina voilonga moivike ei twa taalela opo va ungaunge nomikundu dopaliko moshilongo.
Eshi kwa li ta popi komaulikilo oipindi koHelao Nafidi moshitopolwahoololo shaHangwena Olomakaya, Nandi-Ndaitwah okwa ti oungudu vowina voilonga otava ka tala kokuxwepopeka eliko, oundjolowele nomaumbo – oinima oyo ya xwaxwamekwa koshoongalele osho sha ningilwe omafiku aa pokati kepangelo noikondo yopaumwene.
“Momukokomoko woshivike tashi ya, ohandi ka hoolola ongudu vatatu voilonga – okuxwepopeka eliko, oundjolowele nomaumbo – ngaashi sha kundafanwa moshoongalele,” osho a ti ngaho.
Presidente okwa yeleka efimano lokutota omudingonko tau tambula ko ekufombinga loshikondo shopaumwene momayambukepo opashiwana neengeshefa odi na oinakuwanifa ya wedwa po da pumbwa okuninga.
“Epangelo oli na oku inga omalunduluko onhumba opo li yandje omhito iwa koshikondo shopaumwene, omangha oshikondo shopaumwene shi na okuliufa koinimaoy tai lalakanenwa kepangelo moiondo ngaashi eyambukepo lopanghalafano nopaliko,” osho a ti ngaho.
Nandi-Ndaitwah okwa ti elineekelo laye kutya omudo tau ya oshongalele pokati kepangelo noshikondo shopaumwene otashi ka kala sha longekidwa nawa nokweeta oidjemo iwa.
“Shimwe osho sha dja moshoongalele eudafano pokati kepangelo noshikondo shopaumwene va longele kumwe mouwa woshiwana,” sho a ti ngaho.
Okwa ti vali oshoongalele eshi paife otashi ka kala hashi ningwa komudo opo shi ete omhito yopambelewa yelongelokumwe pokati kepangelo noshikondo shopaumwene, tashi pitike eembinga adishe di udeko nawa nawa oinakuwanifa yado mokutunga oshiwana, mokuyambula po eliko neyokomesholekwatelemo.
“Elongelokumwe eli ola fimana mokutota oilonga, okushonopeka oluhepo nokuxwaxwameka eyokomesho laaveshe,” osho a ti ngaho.
