Presidente Netumbo Nandi-Ndaitwah okwa ti eemhito doilonga di li 18 000 domoilonga i fike po500 000 oyo ya udanekwa kepangelo laye oda teelelwa di dje moshikondo shoikwamina.
Eshi kwa li ta popi pomaulikilo oipindi yoikwamina ehangano loChamber of Mines mOvenduka Etitatu, okwa ti oshilongo oshi na ouyamba weendjo dopaushitwe nosha pumbwa oku shi ulika.
Okwa ti shihapu natango osha pumbwa okuningwa ngee tashi ya keepoloyeka dokufukula nokukonga eedjo dopaushitwe.
“Vamwe ohave ya noimaliwa, ashike otu na eenghono shaashi otu na eedjo.
Inatu hadeka ashike omadilaadilo etu noimaliwa. Inatu kundafana nomitwe diha di oluhepo,” Nandi-Nditwah ta ti.
“Oshikondo shoikwamina osha kala alushe sha fimana kuNamibia.” Eshi kwa li ominista yomakwatafano opaiwana, Nandi-Ndaitwah okwa li ha pulwa kovanangeshefa vokondje yoshilongo kombinga yoikwamina moshilongo, unene ngaa okawe, osho a ti ngaho.
Paife, moNamibia omu yadi eedjo dopaushitwe, osho tashi holola kutya oshilongo oshi na eenghono dokukundafana molweedjo dasho, osho a ti ngaho.
“Pefimbo lomatalelopo [koTanzania naChina], otwa popila elongelokumwe kunghonopekwe engushupaleko leedjo detu opo ovanhu vetu va mone omauwa,” Nandi-Ndaitwah ta ti.
OMAUDANEKO
Presidente okwa ti okwa mangulukila omadilaadilo a yooloka taa lalakanene okuyambula po oshikondo shoikwamina.
“Kwashilipalekweni kutya epangelo letu ole litula mo mokutota omudingonoko uwa wongeshefa.”
MuDesemba, presidente okwa li a tota oungudu voilonga vowina ve li vatatu, kamwe oke na sha neyambulepo leliko, oundjolowele, omaumbo nomadu.
Ova teelelika va yandje omapopilo kepangelo pexulilo lomwedi ou. Presidente okwa ti okwa lombwela eeministeli di tule moilonga omapopilo oo taa ka etwa koungudu ava.
“Ashike olopota oyo i tya sho oi na okudja moshikondo mwoovene. Lombwelei nge ngee oinima otai longo ile itai longo,” osho a ti ngaho.
Presidente woChamber of Mines, George Botshiwe, okwa ti oshikondo shoikwamina nashi longife oshoongalele eshi okutala komikundu odo sha taalela.
Minista woikwafaabulika, eemina noikwanghono Modestus Amutse okwa ti okwe lineekela kutya oshoongalele otashi ka tala kengushupaleko loinima moshilongo.
“Ondi na omukumo kutya oshikondo eshi otashi dulu okweeta omauwa ahapu ovanhu vetu neliko letu. Opo tu mone omauwa eedjo detu natu xulife po okufukula oko akuke,” Amutse ta ti.
Okwa ti ombelewa yaye otai longo mo omulandu wokumona omauwa taa di meedjo, oo tau ka manifwa ndee tau tumwa kombelewa yapresidente pexulilo lomwedi ou.
