Namibia okwa udaneka kutya ita pwilikine nande komalombwelo opaunyuni oo taa pula e likaleke kokule naCuba, nomuprima minista Elijah Ngurare okwa udaneka kutya oshilongo kashi na nande efiku shi xulife po oukaume washo wefimbo lile naCuba kutya nee okwa tulilwa po eendjidikila dopaliko.
Ngurare edi okwe di popya moshilando Havana moCuba, Omaandaxa pefimbo ledimbuluko ledalo lomuleli a fimana Fidel Castrol.
Okwa ti Namibia oku na oshinakuwanifa shokuyambidida Cuba, ta dimbuluka onghandangala oyo ya danwa koshilongo eshi pefimbo lekondjelo manguluko laNamibia.
“Cuba okwe tu vatela pefimbo lekondjelo manguluko letu. Eshi vahapu ve tu pilamena va yambidida omukolonyeki South Africa, Cuba okwa li pamwe nafye,” Ngurare ta ti.
Okwa ti Namibia ita dimbwa oilonga ya fimana yaCuba pefimbo letanga loCarlota, oyo ya tameka momudo 1975 nokwa li ya kwatela mo ovalumenhu novakainhu vaCuba ve dulife po400 000 moita yakula koumbuwanhu waAfrica.
Ngurare okwa ti Cuba okwa yambidida olwoodi lokoCuito Cuanavale mokuhanauna po etanga lovakwaita laSouth Africa osho sha eta emanguluko laNamibia momudo 1990.
“Cuito Cuanavale omundilo waalushe oo uhe na fiku u ka dime,” osho a ti ngaho.
Ngurare okwa indila yo Oiwa yaHangana i longife eenghono dayo opo i fininike Amarica a kufe po eendjidikila dopaliko odo a tulila po Cuba, ta ti kutya kadi shi dopaunhu.
Okwa ti oda eta omumbwe yolusheno nomiti, omanga omatando kwa li a kalekwa molwomumbwe yomiti nolusheno.
Okwa udaneka kutya Namibia, koshi yapresidente Netumbo Nandi-Ndaitwah, ota twikile nokuyambidida Cuba.
