MVA Fund a londodha aaniihauto omolwomvula

Oshikethahangano shiiponga yiihauto moshilongo sho-Motor Vehicle Accident (MVA) Fund osha gandja ekunkililo kaaniihauto ya hinge nuukeka moopate sha landula omvula onene ndjoka ya ningi omasiku tayi ga dhenge pevi miitopolwa ya yooloka moshilongo.

Oshikethahangano shoka osha londodha kutya uuna kwa lokwa ohashi etitha iiponga nuupu nonkene aaniihauto otaya dhimbuluthwa ya hinge nawa yo ya shilipaleke kutya iihauto yawo oyi li monkalo yi li nawa.

Pamukanda ngoka gwa pitithwa oshiwike sha zi ko komupopiliko gwoMVA Fund, John Haufiku, ogwa popi kutya ngashingeyi ethimbo lyomuloka nonkene oopate ohadhi kala nomuthenu pethimbo tayi loko, ishewe ohashi kala oshidhigu komuhingi okumona ko nawa.

MVA Fund okwa totha mo wo nokulondodha aaniihauto ya yande okutaaguluka omilamba ndhoka tadhi tondoka omeya moondolopa, shoka kwa konekiwa hashi kambadhalwa kaaniihauto pethimbo ndika.

“Onkambadhala yokutaaguluka omulamba gwomeya taga tondoka osha nika oshiponga noonkondo, molwashoka etondoko lyomeya ngoka ohali vulu okweeta omuhingi a nyengwe okukondolola oshihauto, nenge oshihauto shi idhime nenge nokuli shi faalelwe,” osho a popi ngaaka.

Aaniihauto oya londodhwa ya yande okutaaguluka omilamba dhomeya ano ya ninge etokolo lyokushuna nenge ya longithe oopate dhilwe ndhoka dha manguluka.

Haufiku okwa kunkilile aaniihauto opo ya hinge ondapo yi li pevi, ya kaleke po omwaka gwa gwana pokati (kiihauto), yo ya kale wo ya tema omalamba uuna taku lokwa. Okwa popi kutya aaniihauto naya iyageke okumbilika osheendelela, okuhingilila osho wo okutanauka osheendelela molwashoka otashi vulu okweeta oshihauto shi thenunuke.

Aaniihauto oyi indilwa wo pethimbo ndika ya shilipaleke kutya omateyala giihauto yawo oge li monkalo ombwanawa, osho wo okushilipaleka kutya iihauto yawo otayi opaleke nawa omakende gokomeho opo ya vule okumona ko nawa.

“Aaniihauto ayehe otaya indilwa lela ya simaneke egameno, yi ikaleke kokule naambyoka tayi vulu okweeta oshiponga yo kaaya dhine oonkondo dhomeya taga tondoka.

Okukala ya lungama otashi vulu okuhupitha oomwenyo,” osho Haufiku a gwedhapo ngaaka.

Uuna puna oshiponga, aaniihauto oyi indilwa ya tsikile nokudhengela onomola yongodhi yoshali yaMVA Fund yo-9682 opo ya mone ekwatho lyomeendelelo.

In an age of information overload, Sunrise is The Namibian’s morning briefing, delivered at 6h00 from Monday to Friday. It offers a curated rundown of the most important stories from the past 24 hours – occasionally with a light, witty touch. It’s an essential way to stay informed. Subscribe and join our newsletter community.