Omunyekadi woshilongo mukulu Monica Geingos okwa pula kulididimikilwe edopo mokati kovanyasha nomahangano taa kwatelwa komesho kovanyasha, ta ti omapuko ohaa dulu okuninga eemhito dokulihonga nokuninga omalunduluko.
Eshi kwa li ta popi pomutumba wo#BeFree Big Talk 2026 mOvenduka Etitano, Geingos okwa ti hakeshe ehangano tali kwatelwa komesho kovanyasha tali shi pondola molweefo lotete ndele ovanyasha nava pewe omhito va dilaadilulule nokukendabala vali.
“Natu lididimikile omadopo amwe omahangano ovanyasha,” osho a ti ngaho.
Ashike nande ongaho, Geingos okwa ti elididimiko eli inali kwatela mo omadopo kombinga youshili nokuninga oinima ya puka.
Okwa ti ovanyasha nava pitikwe ve lihongele keepolohalama odo inadi dula oku shi pondola ndee tava tale kutya oshike sha longa naasho inashi dula okulonga.
“Natu mu pe olweefo limwe,” osho a ti ngaho.
Geingos natango okwa ti omahangano naa dule okufila ovanyasha onghenda ovo va ninga omapuko ndele ove lilongekida okulihongela komapuko oko.
Okwa ti ovanyasha ova pumbwa ovanhu ovo tava dulu oku va lombwela opo va puka manga yo natango tave va vatele va kufe ondjila i li nawa.
Omunapaliamente Willem Amutenya okwa ti ovanyasha navo nava kale ve lilongekida va kalele po oinima melelo ndele tava yambidida ovo ve lineekelelwa nale okulela.
“Otwe lilongekidila ngaa okulela? Otwe lilongekida ngaa okuyambidida ovo tava lele nale?” osho a pula ngaho.
Omukalelipo wehangano ledina Commonwealth Youth Council Africa Rigional Representative Rosy Shaneck okwa ti elelo inali ningwa ashike okukala nedina.
Okwa ti ovanyasha nave lihonge okuwanifa po oinakuwanifa oyo ve lineekelelwa.
Shaneck okwa pula ovanyasha va twikile nokunghonopeka vakwao kutya nee ove na eemhito melelo ile kave na sha.
