Swapo okwa ti omunashipundi wOmutumba wOpashiwana Saara Kuugongelwa-Amadhila itadi koshipundi “moipafi yavo”.
Omupedu hamushangandjai woSwapo Uahekua Herunga Etine okwa nyamukula keindilo tali pula Kuugongelwa-Amadhila a kufwe ko, la etwa mOmutumba wOpashiwana kongudu yoIndependent Patriots for Change (IPC) Etitatu.
“Itashi ningwa. Itava kufa ko omunashipundi. Otwe mu hoolola a ninge omunashipundi ndee katu wete ta ningi oshinima sha puka,” osho a ti ngaho.
Herunga okwa ti okwa li pu na onghendabala yokukundafana kombinga yoshinima eshi omanga kwa li inaku ningwa eshiivifo lomondjila ngaashi shi na okuningwa.
“Ito dulu okuya komesho noshikundafanwa shokukufa ko omunashipundi ino ninga eshiivifo manga inashi ya moilonga. Itatu shi pitike,” osho a ti ngaho.
Herunga okwa ti oshinima eshi opolitika ashike tai lalakanene okweeta engwangwano mopaliamente.
“Itatu kala ashike hatu tale opaliamente tai ningi oshidanaukilo,” osho a ti ngaho.
Eengudu domilameno oda pumbwa okuya kumwe ndee tadi mono omawi e li anhe oilyo yoSwapo opo di dule okukufa ko Kuugongelwa-Amadhila.
Omunashipundi okwa kala moshipyu okudja keengudu domilameno eshi vati ta dopa okuwanifa po eemhango dOmutumba wOpashiwana pauyuki nopuhe na olwaamambinga.
Oshinima eshi osha xwama oshivike sha dja ko konima oshilyo shongudu yoIPC Michael Mulunga a ninga eindilo opo omunashipundi a kufwe ko koshipundi.
Ashike oshinima eshi natango opo tashi ka etwa poshitaafula konima Kuugongelwa-Amadhila a dopa okuninga etokolo kombinga yeindilo eli mokati keenamanana mOmutumba wOpashiwana.
Mulunga Etitatu okwa ti omunashipundi ina hala okutambula ko eindilo laye shaashi osheetwapo oshi li kombinga yaye, osho she mu djuupalela okuninga etokolo kombinga yoshikumungu manga ina ninga omapulaapulo.
She likolelela komuwiliki wovanapaliamente vongudu yoAffirmative Repositioning (AR) Vaino Hangula, Efinamhango otali popi kutya omunashipundi ota dulu okukufwa ko “ketokolo lOmutumba wOpashiwana” okupitila momahoololo.
Hangula okwa ti ongudu yavo otai yambidida lela eindilo lokukufa ko omunashipundi ngaashi tashi pulwa kongudu yomilameno yopambelewa.
Efinamhango ola ti oilyo i li o49 oi na okukala i li mopaliamente opo omahoololo a dule okuya komesho.
Omunapaliamente woSwapo Willem Amutenya Etine okwa ti oupyakadi kau shii ashike ngee Swapo ota hoolola e li ominge neindilo eli.
“Epulo lakula ole li ngee oshinima eshi osha etwa po ngaa kwa landulwa omilandu odo di na okulandulwa ngee tashi ya kokuninga eindilo lokukufa ko omunashipundi.
“Swapo ota ka popila omilandu odo di na okulandulwa . . . ngee eindilo ola wanifa po omilandu adishe dopafinamhango, nali ungaungwe nalo ngaashi shi na okukala.
Ngee inali di wanifa po, opaliamente nai shi popye,” osho a ti ngaho.
Amutenya okwa ti oshi na sha nokwaamena omilandu, okufimaneka Efinamhango nokukwashilipaleka kutya Omutumba wOpashiwana inau ningwa onhele yokuhalandu eemhango.
