IShowSpeed a talelepoevi lyomapendafule

“ONDILI pokuninga Omuhimba – natuye!” mbyoka oyo iitya nomatumbulo Darren Watkins Jr ngoka a tseyika nawa nedhina IShowSpeed, a popi sho ta lombwele aalanduli ye oomiliyona mboka kwa li ye mu tala komalungula okupitila koYouTube, pethimbo tayi mondjugo yopamuthigululwakalo gwAahimba – mOkahandja.
Omuamerika ngoka IshowSpeed, oha mono aalanduli aape omayovi konyala esiku kehe muuyuni unene tuu aanyanyamagulu mboka yena ohokwe mokulandula iinyangadhalwa ye kiikundaneki yopankalathano – komalungula.
Mbala sho a ndjakele mOvenduka uunambo, okwa taambiwa ko kolaata yokuyambulapo nokuhwahwameka omapungulilo gomoshilongo yedhina Namibia Investment Promotion and Development Board (NIPDB) osho wo kuminista gwomauyelele nomakwatathano gopaungomba, Emma Theofelus.
Molwashoka oha kala tu ulikwa komalungula (okupitila koYouTube) – pethimbo tashi ningwa – IshowSpeed okuulukile aalanduli ye shoka tashi ningwa sho a thiki mOkahandja okutsakanena nomuhoko gwAahimba osho wo aayelele. Pethimbo a talelepo Aahimba, oku ulukilwa iinyangadhalwa yopamuthigululwakalo gwomuhoko ngoka.
IShowSpeed kali naanaa a kumwa sho a lombwelwa komuwiliki gwAahimba opo a kuthe mo ombulukweya ye ye a zalekwe oshipa shomuzalo gwopamuthigululwakalo ngoka, ashike okwa li a kumwa noonkondo sho a lombwelwa kutya momuhoko gwAahimba omulumentu okwa manguluka okukala naakiintu ya konda pu gumwe.
IshowSpeed, ngoka a gwanitha omimvo 21 oshiwike sha zi ko, okwa zalekwa iikutu yaagundjuka yAahimba mboka inaaya hokana.
“Oha mu popitha ngiini?” osho a pula omuwiliki ngaaka, omanga inaa tameka okumweelekela tati “moro” sho ta popitha Aahimba mboka ye li pondje yondjugo.
Yilwe yomwaambyoka ya kumitha IShowSpeed oosho a lombwelwa kutya aakiintu yomuhoko gwAahimba inaya iyogo.
“Ihatu iyogo nomeya nande nande. Ohatu gwaya owala omagadhi noshidhe. Oshidhe ohashi tu kwathele kaatupye komutenya osho wo kokudhengwa kuutalala,” osho omuwiliki a kalelapo Aahimba e mu lombwele ngaaka.
Okwa longwa wo iitya yimwe yomelaka lyAahimba nokwa yelithilwa ondjokonona paufupi kombinga yomizalo dhawo, unene tuu ngele tashiya pokuyoolola pomizalo dhaamboka ya hokana naamboka inaaya hokana.
Okuza mpoka, IShowSpeed okwa talelepo omuhoko gwaayelele nokumona ompito yokutala nkene haya tema omulilo pamuthigululakalo, osho wo okuumba taya longitha uutati noondayi.
Osheendo sha IShowSpeed, osha tsikile nokugalukila moshilandopangelo pomatala goSingle Quarters moKatutura, moka a lolo onyama yokapana mekwatelo komeho lyaPinehas Shikulo ngoka a tseyika nawa nedhina Zulu Boy.
“Otwe ku taamba ko moNamibia kuume. Onkene, ndjino oyo onyama tayi tokola elaka muuyuni, onyama yongombe dhingi muuyuni, yondondo ya-A,” osho Zulu Boy e mu yelithile ngaaka.
“Ndele onyama yongombe yaNamibia ohayi endepo nawa. Ombwanawa lela,” osho IShowSpeed a popi ngaaka, sho ta li okapana.
Okuza mpoka, okwiidhenge ondjila okuya mepandaanda lyaIndependence Avenue ndyoka lya taakana ondolopa yoshilandopangelo, naasho a thiki poZoo Park okwa adha po engungo enene lyaagundjuka, ye mu tegelela.
Sho a heluka moshihauto okwa taambiwa ko koongundu mbali dhopamuthigululwakalo gwAakavango osho wo gwAanama.
Okuza mpoka, omutondoki omuNamibia John Deon okwiindile opo IShowSpeed a tondoke naye okutala ngoka ta thigi po mukwawo ashike (Deon) okwa thigwapo.
Pehulilo, IshowSpeend okwa tongonona olweendo lwe menenevi Afrika ongoshinima she mu endela nawa lela.
“Olweendo nduka olwa lundulula onkalamwenyo yandje, nonda hala okupandula noonkondo kehe gumwe a kala nokulandula ndje molweendo nduka. Onda tsakanena naantu oyendji aawanawa. Kehe gumwe oku ulukila ndje ohole, notakambadhala okupapatela ndje. Ondina edhiladhilo lyokugandja sha moshigwana opo ndi yambidhidhe iikonga yomakwatho pomahala gamwe ngoka nda talelepo,” osho a popi ngaaka.
Pehulilo lela okwa popi kutya oshizemo she shombinzi oshu ulike kutya ye omuAfrika lela oopelesenda 100.
Elalakano lyaIShowSpeed enene okutalelapo iilongo menenevi lyaAfrika okwiitalela ko ye mwene oonkalo dha yooloka, unene tuu ngele otashiya pamithigululwakalo, ye u ulukile uuyuuni kombinga yuuwanawa tawu monika mo – okupitila komalungula hoka e na aalandula oomiliyona.
Namibia shimwe shomiilongo ya ningi elago lyokutalelwapo kuIShowSpeed ngoka a talelepo iilongo ya yooloka menenevi lyaAfrika, mule wiiwike ya piti sho a talelepo iilongo yi li po20 muule womasiku 28.
Aalanduli ye oomiliyona oya mona shoka shi li moNamibia unene tuu mpoka IshowSpeed a talelepo.

In an age of information overload, Sunrise is The Namibian’s morning briefing, delivered at 6h00 from Monday to Friday. It offers a curated rundown of the most important stories from the past 24 hours – occasionally with a light, witty touch. It’s an essential way to stay informed. Subscribe and join our newsletter community.

The Namibian uses AI tools to assist with improved quality, accuracy and efficiency, while maintaining editorial oversight and journalistic integrity.