Ongudu yoIndependent Patriots for Change (IPC) oya ti kutya “epangelo” ola longifa eenghono dalo epuko eshi la wedela oshikako shomukulunhuwiliki oo ta fiye po Okomisi yOkulwifa Oulingilingi, Paulus Noa neemwedi mbali puhe na ediminino okudja kopaliamente.
Momukanda wa shangwa onghela komuleli wongudu yomilameno yopambelewa, Imms Nashinge, ongudu oya ti presindente ke na eenghono definamhango dokuwedela oshikako sha pwa ko oye auke puhe na ediminino lopaliamente.
“Okupita opaliamente pomunghulo manga i li mokafudo okwa lyatela pedu etopoko neenghono nokutula omatokolo Omutumba wOpashiwana poutivali,” omukanda tau ti.
Ongudu oya ti oya ka uda ashike kutya, pefimbo lokafudo kopaliamente epangelo ola wedela oshikako shaNoa neemwedi mbali netomeno kutya eyomoshipundi shetulumuko laye “inali tameka natango”.
Omuleli woIPC mopaliamente okwa ti, oveta otai pula epangelo li wedele oshikako shomuwiliki wokomisi ei ngee sha kolekwa kOmutumba wOpashiwana.
Nashinge okwa ti omatokolo, omapeko noinima aishe ya pitikwa komulunhuwiliki oo oshikako shaye sha pwa ko otashi dulika i ka taalele omakondjifo opaveta ngee ewedelo inali diminwa kopaliamente.
Ongudu natango oya ti okomisi kai na owike opo i kale tai wilikwa kovanhu vatatu.
