Oministeli yOmakwatafano opaiwana nOipindi oya koleka kutya inaku lopotwa nande Omunambia umwe a li mobesha oyo ya mona oshiponga shi nyanyalifa moAngola moshitukulwa shaCuanza Sul.
Oministeli oya ti ombelewa yaNamibia moLuanda oya dengela ehangano loyeendifo ledina Macon Transpoters konima kwa udika eelopota doshiponga, i koleke ngee omwa li mu na Omunamibia.
Oshiponga osha lya ovanhu ve li 21 ndee tashi fiye vahapu va lemana.
Ashike nande ongaho, ovanambelewa otava kendabala va mone kutya oolyelye va ningwa oihakanwa.
Eelopota inadi kolekwa otadi popi kutya omwa hangika mu na Ovanamibia vahapu.
Oministeli oya ti she likolelela kouyelele wa dja kehangano lobesha oyo, inaku kolekwa nande Omunamibia umwe a li mobesha omo.
Oministeli oya ti ombelewa yoshilongo inai mona nande omapulo okudja kovakwapata e na sha novakwapata ovo tashi dulika va li mobesha omo.
“Oministeli otai twikile nokuwilika onghalo okupitila mombelewa yoshilongo nomalutu epangelo omondjila moAngola ndee tai ka shiivifila oshiwana ngee pe ya ouyelele upe,” omukulunhuwiliki ta vatele Nghipondoka-Robiati ta ti.
Ngoloneya woshitopolwahoololo shaHangwena Kadiva Hamutumwa Etitatu okwa ti: “Pondodo ei, ombelewa yange inai mona nande ouyelele tau popi kutya moshiponga omo omwa li Omunamibia.”
She likolelela kouyelele wa dja koCuanza Sul, omidimba dovanhu ve li 22 ovo va fila moshiponga omu Omaandaxa okwa li da twalwa kokila yoshipangelo shaBenguela General Hospital manga epangelo tali lilongekida li mone kutya ovanhu ava ovo oolyelye.
Eefamili odo di shi kutya mobesha omwa li ovakwapata otadi indilwa di lilopote koshikondo shomakonakono opaungoba shounamiti koBenguela, Angola, opo di yambidide okudimbulula oonakuningwa oihakanwa.
Ovakwapata ovo va pumbwa ouyelele otava dulu okudengela oshikondo shomayakulo omakonakono shaCuanza Sul ko+244 938 158 306.
Oshiponga osha ningwa ongula yOmaandaxa moGangula mondjila yoEN100.
Eelopota oda ti, okahaleluya ka umbada omahooli oke lidenga mumwe nobesha, oyo kwa li ya umbata ovanhu ve li 47.
