Omuprima minista Elijah Ngurare okwa yandja elombwelo kehangano lipe loRundu Town Council Commercial Services (RTCC) opo liha kale ashike la tala mokuninga oiyemo, ta ti eyandjo lomayakulo koshiwana olo nali kale elalakano lakula.
Ngurare edi okwe di popya pefimbo lepatululo koRundu moshitopolwahoololo shaKavango Uninginino Etitano.
Okwa ti ehangano lopangeshefa, lewiliko lodoolopa, oshinima shoshiwana ndee nali kwashilipaleke kutya ola dja omauwa oshiwana.
“Onghee nee, elalakano, inali kala ashike oiyemo.
Eyandjo lomayakulo oshiwana alushe olo nali u ye tete,” osho a ti ngaho.
Ngurare okwa ti omalelo eedoolopa ee li momumbwe yokuwapaleka omadu, omaumbo, eendjila, omeva, oundjuwo neenhele doimbodi, omanga oimaliwa natango inai wana.
Okwa ti omawiliko naa konge omikalo dipe dokuninga oimaliwa yomayambukepo ponhele yokukala ashike taa wedele oishoshela yomayakulo ile e lineekela ashike moimaliwa tai di kepangelo.
“Okuwedela oishoshela yomayakulo kaku shii ekandulepo lomukundu alushe ile okulineekela ashike moimaliwa yepangelo,” Ngurare ta ti.
Okwa pula omalelodoolopa a konge omikalo dokuninga oiyemo, taa longifa omaliko amuni nawa, taa kongo ovanangeshefa nokulandula eemhito deengeshefa domondjila.
Okwa ti oRundu oi na eemhito diwa dopaliko meenhele ngaashi okuyambula po omatungo, omapashiyono, ounamapya nounaimuna naikwao ihapu.
Okwa londwela kutya omaliko oshiwana inaa kala ashike peembapila ashike naa lundululilwe moinima tai eta oilonga noiyemo.
Natango okwa indila yo weilikongudu lehangano eli opo li longe noushili nokulela nawa, manga tali kwashilipaleke kutya ehangano inali ninga po oshinima shoohandimwe.
Ngurare okwa ti elalakano linene nali kale okuyambula po eliko nonghalafano yovakalimo vaRundu.
“Epatululo kali shi exulilo.
Oilonga yoshili oya tameka nena,” osho a ti ngaho.
