OMWIIMBITHI nomutoti gwomaimbilo gopambepo, Peter Ambambi – a tseyika nawa nedhina Omuwambo gwa Ambambi, okwa lombwele Oshifo shika kutya okwa pititha okaCD okape komaimbilo gOpaasa.
OkaCD haka okwe ka imba pamwe naaimbi yomongundulwiimbo yEgongalo lya Immanuel mu Katutura mOvenduka, mewiliko lya tate Elifas Uushona Nangolo na tate Sakaria Nangombe.
Aasamane mbaka oya li ya ningi eindilo ku Gwa Ambambi opo e ya dheule nawa mokwiimba omaimbilo gOpaasa nokuya fala mOstudio, kohi yewiliko lyehangano lya M’uambo Musical Works (MMW).
OkaCD haka oke na omaimbilo ge li 12, taga popi okuhepekwa nokusa kOmuhupithi gwetu, Jesus Kristus,’ Gwa Ambambi ta popi ngaaka. Momumvo 2004, Gwa Ambambi okwa pitithile wo UuCD uya li womaimbilo gOpaasa, ye na kuume ke Elia lya Tshiimi (a tseyika nawa nedhina Tshiimi TshOmukwambi, ngashi yi iluka yoyene ‘Two Brothers- Chior.’
Gwa Ambambi oku li gumwe gwomaaimbi naatoti yomaimbilo gopambepo a simana mu Namibia noku na oongundulwiimbo odhindji moshilongo, kohi yewiliko lyehangano hali ithanwa MMW.
‘Otandi longitha omagano nuunongo mbuka nda pewa ku tate Kalunga manga ndi li momwenyo, nesiku ta ka zimbula ndje ndi thigila aashitwa ya Kalunga uuthiga wopambepo nowopaliko wo,’ Gwa Ambambi ta popi ngaaka.
OkaCD haka ota ka monika pomahala agehe mpoka hapu kal UuCD womwiimbi nguka.
Uuyelele ulwe otau monika ko: 081 24 77055.
Stay informed with The Namibian – your source for credible journalism. Get in-depth reporting and opinions for
only N$85 a month. Invest in journalism, invest in democracy –
Subscribe Now!
