Omutamanekindjai Martha Imalwa okwa ulikwa vali a ninge omutamanekindjai ta vatele waNamibia oule wodula, okomisi yoikwaveta yaNamibia osho ya shiivifa ngaho.
Imalwa, oo a kala omutamanekindjai waNamibia okudja muJanuali 2004, okwa ulikwa kupresidente Netumbo Nandi-Ndaitwah a ninge omutamanekindjai ta vatele ngaashi okomisi yoikwaveta yaNamibia ya pula okudja muJanuali fiyo opexulilo lomudo 2026, hamushanga wokomisi yoikwaveta yaNamibia Elias Shikongo okwa shiivifa oshinima eshi Etitano.
Oshikako shaImalwa otashi pu ko pexulilo lohanhi ei.
“Okomisi oya tameka nale omulandu wokukuta omutamanekindjai ou ta shikula ko mokushiva ovanhu aveshe ve na owino va ninge omaindilo,” Shikongo osho a ti ngaho.
“Eekandidate odo tadi ka kufwa mo otadi ka ningilwa omakonakono a mana mo tashi lalakanene okumona okandidate oyo i na owino ya shiya ko a ulikwe kupresidente ngaashi ekotamhango neeveta tadi ti,” Shikongo osho a ti ngaho.
Okwa weda po: “Euliko lomeni otali ka kwashilipaleka ombili neyokomesho loilonga yombelewa yomutamanekindjai inai kwatwa moshipala mangha okomisi tai manifa okutala kutya olyelye ta dulu okutwikila noilonga ei.”
Imalwa, oo ta wanifa eedula 65 muDesemba omu, okwa li tete a ulikwa kupresidente Sam Nujoma a ninge omutamanekindjai oule womido 10 pexulilo lomudo 2003.
Pexulilo lomudo 2013, presidente Hifikepunye Pohamba okwa li a ulika Imalwa a twikile noilonga ei oule womido heyali.
Presidente Hage Geingob natango okwa twikila naImalwa ongomukwateli komesho wombelewa yokutamaneka yaNamibia oule womido nhano da wedwa po muDesemba 2020.
